Iaid Rally ka JAC, dawa pynneh Ïa ka ophis Ri Muliang C&RD Block ha Nonglang

Da ki hajar ngut ki nongshong shnong na ki 40 tylli ki shnong kiba hap hapoh ka Joint Action Committee (JAC) Ri Muliang C&RD Block ki la mih paidbah ha ka jingïaid rally ha Nonglang ban dawa na ka Sorkar ba kan pynneh ïa ka ophis ka Ri Muliang Community and Rural Development (C&RD) Block ha Nonglang kumba la dep mynjur bad buh mawnongrim mynshwa.
Ka rally ka la sdang na Umwahlang bad kut da ka jingïalang paidbah ha madan Nonglang. Ki paidbah ki la rah ïa ki placard bad pyrta da ki slogan ban pynpaw ïa ka jingpyrshah ïa kino kino ki jingthmu ban pynkynriah ïa ka ophis sha Tynghor, haba ka mawnongrim jong kane ka projek la dep ban buh ha Nonglang ha ka 22 tarik Naiwieng 2022.
Haba kren ha ka jingïalang, ki nongai jingkren ki la pynpaw ïa ka jingpyrshah kaba jur ïa kino kino ki jingthmu ban pynkynriah ïa ka ophis bad ki la kynnoh ruh ba u MLA ka Rambrai-Jyrngam, Bah R.G. Momin, um shym la shim ïa ka nongrim kaba shai halor kane ka kam.
Ki nongkren ha ka jingïalang ki kynthup ïa u Bah Johnes Sohshang, Secretary ka Hima Nongmynsaw; Bah Ailan Lyngdoh Nonglait, Sordar ka Nonglang; Kong Sentilin Shangdiar na ka kynhun Longkmie; Bah Isnine Nongdoh na ka JAC; Bah Shaphrang Lyngdoh bad Bah K.D. Syiemlieh, Secretary ka Nonglang. Ïa ka jingïalang la pynïaid da u Bah Tras Nonglang, Sordar ka Mawsikar.
Ka JAC ka la ong ba baroh ki 40 tylli ki shnong kiba hap hapoh ka proposed Ri Muliang C&RD Block ki ai ka jingkyrshan kaba pura ban pynneh ïa ka ophis ha Nonglang. Ka Committee ka la kyntu ruh ïa ka Sorkar ba kan pynsted ïa ka jingpynbeit ïa u pud u sam hapdeng ka Meghalaya bad Assam namar ki jingeh kiba dang bteng ba ki nongshong shnong khappud ki ïakynduh.
Ka JAC ka la pynskhem ba kan bteng ïa ka jingïakhih paidbah kaba jai jai tad haduh ba ka Sorkar kan pynbna paidbah bad pynshisha ba ka ophis Ri Muliang C&RD Block kan neh ha Nonglang kumba la dep mynjur mynshwa.