Da ka Prof Barrister Pakem Academic Award pynkup burom ka JSU ia ki samla pule

Ka Jaintia Students’ Union (JSU), West Jaintia Hills District ha ka sngi Saitjain ka la pynkup burom 1st Prof Barrister Pakem Academic Award ia palat 80 ngut ki samla pule ba wan shakhmat ha ka jingialang ha District Library Auditorium, Jowai.
Kane ka jingai khusnam ka long shibynta ban kynmaw burom ia u (L) Prof Barrister Pakem bad Myntri ka Pule Puthi Bah u Lahkmen Rymbui ula long u Kongsan ha ryngkat ka jingdonlang u Pro Vice-Chancellor barim jong ka skulbah NEHU u Prof Henry Lamin, u MDC ka Jowai Central u Bah Andrew Shullai, Dr Didakamiwan Khonglah, khun u Prof Pakem nalor ki kmie kpa ki samla pule ba ioh khusnam, ki nongialam ka JSU bad kiwei.
Haba kren ha ka jingialang u Bah u Lahkmen Rymbui ula ong, ka jingnang jingstad ka dang iai long ka atiar ba khlain bor na bynta ka jingpynkup bor bad ka jingpynkylla ia ka imlang sahlang. Ka jingnang jingstad kam dei tang ka dak lane ka jingioh kyrdan pule bad ka jingjop ba shisha la thew ym da ki jingjop ha ka pule puthi hynrei wat ha ka jinglong briew, ka jinglong nongialam bad ka jingshakri ia ka imlang sahlang.
U Myntri ula iaroh ia ka JSU kaba ka la ai khusnam bad ula ong, ka dei ka jingai burom ia uwei na ki riewstad bad u briew ba iohi jngai, kiba ki kam jong u ki dang iai bteng ban long ka jingai mynsiem ia ka pateng ba mynta bad ka ban sa wan.
Ula ong, ka jingpynkup burom ia ki khynnah pule ba paw shakhmat ka long kum ka jingai mynsiem ia ki samla pule ba kin bteng ban iakhun tyngeh ha ki jingpule ba shakhmat bad ka lawei ka Meghalaya ka shaniah ha ka jingjop ki samla kumta ula kyntu ia ki samla pule ban pyndonkam hok ia ka sap ban poi sha ka thong bas ha khliar duh.