Hiar jurip ki Myntri ia ka jaka ban tei mot Kiang Nongbah ha Jowai

U Myntri ka tnad Arts and Culture u Bah Sanbor Shullai ryngkat u Myntri ka koit ka khiah u Bah Wailadmiki Shylla ki la leit jurip ia ka jaka jong ka Tnad Transport hajan ka Kiang Nangbah Government College, Jowai, West Jaintia Hills ban tei u motsahnam ba shi rynieng jong u Khlawait ka ri u Kiang Nangbah bad ia ki jaka pynbyrngia ban khring ia ki nongjngohkai sha kane ka thain.

“Kane ka dei ka sien ka baar, ba ngi lah ia wan jurip ia kane ka jaka bad mynta ka kynti ngin ialeh ban pyndep noh ia ka jingtei ia une u motsahnam jong u Kiang Nangbah ha ka jaka jong ka Tnad Transport” la ong u Bah Sanbor Shullai hadien ka jingjurip bad ka bynrap “Ha u snem 2022, ha ka por ba nga long u Myntri uba khmih ia ka Arts & Culture, ngi lah shimkhia bad wan jurip ia kane kajuh hi ka jaka ryngkat ka jingdonlang u MLA ka thaiñ, ki nongialam shnong bad ki nongialam sengbhalang ka rilum Jaintia bad ngi lah phah ia ka jingthoh sha ka tnad Transport bad la pynbna ruh ia kane ka jaka kum ka Kiang Nangbah Square. Ngi lah pan 10,000 sq ft ka jaka ban pynieng ia u mot sahnam ba shi rynnieng jong u Kiang Nangbah, hynrei kala wan noh ka elekshon bad ngam shim la long myntri sorkar shuh bad kane ka kam ka la sahkut noh”.

U Bah Sanbor ula ong, “Kane kan dei ka jingwan jurip kaba khatduh bad ngi lah ia rai ban ieng beit ha kajuh ka nongrim ban pan 10,000 sq ft ka jaka na ka tnad Transport bad hadien kane, yn sdang ban phah noh ia ki kot ki sla ban ioh pynieng ia u motdur ba shi rynnieng”.

Ula ong, da ka jingiatreilang baroh hapoh ka jingialam u MLA ka thaiñ Bah Waialdmiki Shylla, ka jingshimkhia u Myntri Rangbah ka Jylla u Conrad Sangma bad u Symbud Myntri Rangbah u Bah Sniawbhalang Dhar kiba la pynpaw ba dei beit ban iaid shakhmat bad ban aiti ia ka kaiphod khnang ba yn ioh ban bhah noh ia ka pisa bad hapoh jong une u snem yn sdang noh ia ka jingtei ia u motdur jong u Kiang Nangbah bad yn buh ruh ia ki jaka bam, jaka shongkai bad ka jingbuh rekod ia ka histori khnang ba kan khring ia ki nongjngohkai.

“Hapoh State Central Library Shillong, u don u motdur ba shi rynnieng jong ka Indira Gandhi bad u Subhash Chandra Bose hynrei jong u Tirot Sing, Kiang Nangbah bad Pa Togan lad don tang uwei u maw kyrteng bad wat u motdur jong u Babu Soso Tham ruh u don uba tang shiteng. Ha ka por jong nga, ngi lah pynieng ia u motdur ba shi rynnieng jongu Tirot Sing, Kiang Nangbah bad Pa Togan bad kane ka jingpynieng kadei ruh namar ka jingai jingmut jong kiba bun ki samla bad ngi iaid ha ka nongrim ban trei beit da ka kam bad ban pynduna ia ka jingkren, namar ka kam ka kham sawa jam ban ia ka ktien bad ngim don por ban leit hylla sha surok, ha iew, shu pynhylla ia ki paitbah bad ha kaba khatduh ka kam pat kam ler”.

Katba u Bah Wailadmiki Shylla ula pynpaw ia ka jingsngewnguh ia u Bah Sanbor Shullai, ki nongialam shnong, ka JSU bad kiwei kiba pyni ia ka jingkwah ban pynurlong noh ia ka jingdawa ba lah slem ban pynsah kynmaw ia u nongiakhun ba pynioh laitluid na rilum Jaintia u Kiang Nangbah.

Ula ong, ba ka jingjied ia kane ka jaka, kadei namar ba ka don mar pyrshah ia ka Kiang Nangbah Government College kaba dei ka jaka pule kaba lah rim bha bad ia kane ka jaka ban buh ia u motdur ha Mihmyntdu yn sa ai kyrteng da ka Kiang Nangbah Square.