Mynjur ka sorkar ban thaw ‘Mining Policy’ na bynta ki par dewiong barit

Ka Sorkar Meghalaya ka la mynjur ban thaw da ka Committee ryngkat bad u Deputy Commissioner (DC) East Jaintia Hills ha ka jingdonlang ki nongmihkhmat ka Jaintia Coal Mines and Stone Quarries Welfare Association (JCOMSWA) ban thaw ia ka Small Scale Mining Policy, hadien ka jingiai bteng u President ka JCOMSWA ban iakhih shah thngan.

U Information Secretary ka JCOMSWA u Bah Overcome Dkhar ula iathuh ia kane ka rai la shim ha ka jingialang ba la pyniaid da u Chief Secretary ka Jylla.

Katkum ka jingong jong u, kane ka Committee kan don thaw (Draft) ia ka Policy na ka bynta ki nongtih dewiong ba don par dewiong ba rit hapoh ka District.

Ka Sorkar ka la mynjur ruh ban pynsangeh shipor ïa ka jingwan kit dewïong na shabar ka Jylla tad haduh ba u Justice (Retd) BP Katakey un wan jurip sha ka thain ha ka 29 tarik Jylliew 2026.

Ki ophisar ki la pynshai ba ki briew ba shah ktah na ka jingshah khang tih dewiong ki lah ban ïoh ïa ki jingmyntoi lyngba ka skhim Meghalaya Environment Protection and Restoration Fund (MEPRF) ba la pyniaid lyngba ka ophis DC, East Jaiñtia Hills.

Nalor kata ka Sorkar ka la kular ban ïakren bad Jaintia Hills Autonomous District Council ban thaw aiñ ban ïada ïa ka hok ki trai jaka.

Wat hapdeng ki jingkular, ka JCOMSWA ka la ong ba kam pat ia kaei ba mih na ka jingialang bad ka la pyntip ba kan bteng ïa ka jingshah thngan haduh ban wan jurip u Justice Katakey.

U Bah Overcome ula pynpaw ba u president jong ka Association u dang shah sumar ha hospital bad ka jingïakhih kan dang ïai bteng haduh ban da ioh jingshai halor ka jingshah biang ïa ki rit ki ria ban tih dewïong kumba mynshuwa.

Halor ka jingtih dewiong da ka juk stad mynta (Scientific Mining), u Bah Overcome ula ong ba ka Association kam pdiang ia ka rukom tih dewiong katkum ka juk stad mynta ba hap don jaka ym duna 100 hectare, ula bynrap kane kam iahap namar kiba rit kim kot bor ban tih dewiong katkum ka juk stad ba bun ka jinglut ia ka jingiohnong.

Ka jingiakhih shah thngan ha East Jaiñtia Hills, ka la sdang halor ki jingdawa ban sdang biang ïa ki kam tih dewïong bad ban don ka Policy na bynta ki nongtih dewïong ba rit kiba shah ktah na ka jingkhang ka rukom tih dewïong thliew khnai (Rat-hole Mining).