Dawa ki Hajong ban tohkit bniah halor ka jingkhlad 2 ngut ki samla

Ki samla pule na ka jaidbynriew Hajong hynne ka sngi ki la dawa na ki bor Pulit bad na ka Sorkar ban pynlong ka jingtohkit bniah kaba khlem shah liang halor ka jinglap ia ka metiap jong ki shijur na kawei ka dukan ha Lumsohphoh ka surok ban leit Nongthymmai Shillong.

Ha shuwa kane ki samla pule ka jaidbynriew Hajong lem bad kiwei ki riew paidbah ki la ialum lang ha Khyndai Lad ban thang mombati kum shibynta ban sngewlem halor ka jingkhlad noh ki shijur ba dei na ka jaidbynriew Hajong.

Lah ban kdew ha ka step 14 tarik Jylliew ki riew paidbah ki la lap ia ki met iap jong ki shijur ha kawei ka dukan kwai dong ha ka surokbah ban leit sha Nongthymmai.

Kine ki shijur ki dei kiba la ithuh kyrteng kum ka Pronome Hajong (22 snem ka rta) na Balat East Khasi Hills bad u Simanta Hajong (21 snem ka rta) na Ranikor South West Khasi Hills.

Ka Samla Joti ka la ong ba watla ki Pulit ki kdew ba dei namar ka jing phasi hynrei ka rukom lap ia ki metiap ka long kaba sngewphylla bad kaba buh dak jingkylli. “Namar kata ngi dawa naki Pulit bad na ka Sorkar ban shimkhia halor kane khnang ba ka jingtohkit kan long kaba khuid bad ka bym shah liang” ka la ong.

Haba phah ia ka khubor sngewlem sha ki longiing, ka samla Joti ka la ong “Nga don hangne ym tang kum ka President hynrei kum ka hynmen jong ki samla ba la duh noh ia la ka jingim, ngi don hangne na ki jaidbynriew bapher bapher ban sngewlem bad kynmaw ia kito kiba la duh noh ia la ka jingim”.