Hiar jurip u Bah Prestone ia ka surok Laitlyngkot, yn pyniaid kali na jaka u Bah Khrik

U Symbud Myntri Rangbah ka Jylla u Bah Prestone Tynsong hynne ka sngi Nyngkong ula leit jurip ia ka surok ba twa harum ka Laitlyngkot bad ula jurip ruh ia ka surok ha shnong Umthli ban phah shna khnang ba ki paidbah kin ioh ban iaid shipor.

Ha ka jingjurip la donlang u MLA Sohra u Bah Gavin Mylliem, u Deputy Commissioner ka East Khasi Hills District u Abhilash Baranwal, u Secretary ka PWD u Bah Bibat Syiem, ka Commissioner and Secretary ka Tnad Revenue and Disaster Management ka Kong Matsiewdor War Nongbri, u SP ka East Khasi Hills u Bah Vivek Syiem, ki ophisar ka sorkar bad ka NHIDCL bad ki nongmihkhmat ka Company ba shna ia ka surok Shillong-Dawki.

U Bah Prestone ula peit bniah ia ka jinglong jingman ka surok ba la julor bad ban peit ia ki lad ban shna biang ia kane ka surok.

Ka jingjulor ka surok ka pynlong ia ki bor pyniaid district ban khang shipor ia ki paidbah bad ia ki kali ban iaid namar ka long ka jingma.

Ka kynhun ka la leit peit ruh na shilliang katei ka surok da kaba iaid lyngba ka surok na shnong Umthli lyngba ka jaka u riewshimet ba la tip u Bah KL Lyngkhoi ne u Bah Khrik, hynrei na katei ka jaka ym lah ban iohi bha ia ka jingjulor namar ka jingrben jong u lyoh khyndew.

Hadien ka jingjurip ula lum jingialang ha IB Laitlyngkot bad ki ophisar ban wad ki lad ki lynti na bynta ki paidbah ka thain ban leit ban wan.

U Bah Prestone Tynsong ula ong, namar ka jingshna ia katei ka surok ba twa kan shim por ka jingialang ka la rai ban shna ia ka surok u riew shimet Bah KL Lyngkhoi ban iaid lyngba ban poi shaduh Laitkynsew bad la bthah ia ka PWD ban pynkhreh ia ka Estimate bad hadien kan phah sha NHIDCL.

Ula bynrap NHIDCL ha dien ba la ioh ka ‘Estimate’ kan pynkloi ban bhah ka tyngka ban ioh shna mardor ia ka surok khnang ba ki paidbah kin ioh ban iaid shwa shipor.

Halor jingkylli u Bah Prestone ula ong, ba ym lah ban kynnoh ia ka company namar ka jingjur slap ha ka miet sngi saitjain kat haduh ba ka um na wah ka long kaba shyrkhei ka la kit ia ki mashin ba pyntrei ia ka surok hajan Dawki.

Ula ong ka jaka ba tuid ka um donkam ban pynkhuid ki maw ba don hapoh ka jingkieng bad lada jur slap ka jingtuid ka um kan sahkut ne ksam kylla ha surok sha kdiang bad kamon bad ka um kan iaid beit sha wah.

“Ngi la bthah ia ka NHIDCL bad ia ka kompani ba kin leit jurip ia ki jaka ba don ki wahduid namar lah ban heh ka um lada jur slap, u Deputy Commissioner un ialam ia ka jingjurip naduh Laitlyngkot haduh sharum ka Pynursla ban peit ioh ki dang don ki jaka ba don jingma bad ban shimkhia mardor” la ong u Bah Prestone.