Ym don jingthmu ban weng ia ka Open Tender: Sanbor

U Myntri ka tnat Animal Husbandry Veterinary u Bah Sanbor Shullai ula pynksan ba kam don ka jingthmu ban pynkut (Cancel) noh ia ka Open Tender ba ia dei bad ka jingtyrwa ban tei ia ka Veterinary Hospital ha Upper Shillong. Kane ka jingkren u Bah Sanbor ka wan hadien ba ki nongialam ka All Meghalaya Contractor Supplier Association (AMCSA) ki la dawa ba dei ban pynkut (Cancel) shwa ia ka Tender bad khot da kawei ka Tender ban phiah ia ki kam ha ka Veterinary Hospital ha Upper Shillong.

Haba kren sha ki lad pathai khubor u Bah Sanbor ula ong “ka AMCSA ka la wan kynduh ia nga bad kyrpad ia nga ban pyndam (Cancel) noh ia ka Tender jong ka Veterinary Hospital ha Upper Shillong, ia kata ngam lah ban ai kano kano ka jingkular ban pynkut ne ban ym pynkut namar ia ka Open Tender la dep khot”. U Bah Sanbor ula ong ba baroh kiba lah (Eligible) lane kiba kot bor bad kiba biang lut katkum ki kyndon bala buh kila lah ban iakhun haka por pyllait iaka Tender. “Ym lah ban khang iano iano, baroh ki lah ban leit thep, te ka jingkylli ban pynkut (Cancel) kam mih kumba kila dawa” ula ong. “Haba ki wan ban kynduh ia nga, nga lah ong iaki ba kin ia shim bynta haka jingthep Tender bad haba kut ka shong pat haka Tender Committee ban rai, iano ban ai iaka kam tei iaka Veterinary Hospital ha Upper Shillong” ula ong.

U Myntri ula pyntip ba iaka Tender la khot mynta la palat shi bnai tam bad ka sngi khatduh kadei 5 tarik Naitung 2026. Ula pyntip ba la mang iaka Veterinary Hospital haka jinglut kaba ym duna T.60 klur. Halor ka jingkynnoh ba ka don jingthep Tender daki briew ba ithuh iaki ba don haka bor, u Myntri ula ong “Kam mih kata ka jingkylli, namar lada ngi la don briew lajong, ngim donkam ban khot Tender. Kadei ka Open Tender, baroh ki Contractor kiba la ithuh daka Sorkar ki lah ban ïashimbynta lada ki biang lut iaki jingdonkam katkum ki kyndon bala buh hynrei haba kut ka shong pat haka Tender Committee ban peit, ban bishar bad ban rai, iano yn ai iaka kam”.