Thaw ka BJP ia ka Mandal ha Mawlai, ki paidbah ki kwah skhim pynroi

Ka Meghalaya Bharatiya Janata Party (BJP) hynne ka sngi ka la thaw ïa ka Mandal ba pura jong ka 15-Mawlai constiteuncy, ha kaba ki nongïalam ka Party ki la kam ba kane ka dei ka sien jam ban pynthikna ba ki nongshong shnong ka constituency ki ïoh kham bha ïa ki skhim kam pynroi ba wan na ka Sorkar Pdeng.U Nongaiktien ka Meghalaya BJP u Bah M Kharkrang u la ong ba ka Party ka dang daka jingkmen namar ka ioh lad ban thaw syndon daka Mawlai Mandal ba pura.“Kiba wan iasoh mynta ka sngi bad ka BJP ki dei kiba ju kyrshan ia kiwei pat ki party ha ki por ba la dep. Hadien bun snem ba ki shem jingeh bad hadien bun snem ba khlem lah ban pynbeit, ki la ong la biang la biang, kiwei pat ki constituency ki la ioh jingmyntoi, te balei pat ka Mawlai kan shah pynduh” la ong Bah Kharkrang.U Bah Kharkhrang ula pynthikna ba u Bah Synsharlang Maiong un bat kum u President ka Mawlai Mandal kaba don mynta 36 ngut ki dkhot.

“Ma u (Bah Synsharlang) bad ka kynhun jong u kin poi sha ki jaka ba jngai jong ka thain Mawlai ban pynsngewthuh ïa ki nongshong shnong halor ki skhim pynroi kiba lah ban ïoh, khamtam ki jingmyntoi ïa ki longïing kiba duk bad kiba duna ka ïoh ka kot” u la ong.“Nai pat iakren iaka surok, kita kin sa wan, ki don bun kiwei pat ki skhim kiba donkam kyrkieh ia kawei pa kawei ka iing” ula ong.U Bah Kharkrang u la ong ba ka jingthmu jong ka Party ka long halor ka roi ka par ban ia ka sain pyrthei.“Iaka ilekshon ngi ieh sha lyndet, ngi kwah ba ki paidbah ka Mawlai kin kiew shaphrang bad ban ïaid ryngkat bad kiwei pat ki constituency, palat 30 ngut ki la ïasoh mynta ka sngi, da kaba don 36 ngut ki dkhot naduh u President haduh ki Executive Member, mynta ngi la don ïa ka Mandal kaba pura, ka sienjam kaba bud ka long ban thaw ïa ki booth committee” u la ong.Na ka liang u president ka Mawlai Mandal u bah Synsharlang Maiong u la ong ba ka rai jong u ban pyniasoh sha ka Meghalaya BJP ka dei namar ka jingbym ioh jingmyntoi ka thain Mawlai haba iasoh bad kiwei ki seng sain pyrthei bad ka jingdkoh ka rukom por ki skhim kam pynroi hapoh ka thain.

“Ngi la iatreilang bad ki seng sain pyrthei bapher bapher ha kine ki snem, hynrei ngim shym la iohi ia ki jingmyntoi baka Mawlai ka ioh” ula ong. “Ki skhim Sorkar Pdeng ki poi sha ki constituency bapher bapher kynthup ha Mawlai, hynrei bun ki nongïoh jingmyntoi kiba dei hok ban ioh kim ïoh ïa ki namar ba ym don mano mano ban iarap iaki ban ioh. Ngim lah ban kam ba baroh ha Mawlai ki im bha, bun ki dang donkam ïa ka jingïarap bad jingkyrshan.”U Bah Synsharlang u la ban jur ba ia ka rai ban iasoh shaka BJP la shim hadien ka jingiamir jingmut lang.“Ngim shym la leh kyrkieh, hadien ba ngi la ia pyrkhat sani bha bad ki paralok, da kawei ka sur ngi la shim ia ka rai ba ka BJP ka lah ban iarap ia kiba duk ha Mawlai, dei na kata ka daw ba ngi la pyniasoh bad thaw ia ka Mandal ba pura”, u la ong.Ka Meghalaya BJP ka la pynmih ia ka jingpynbna ba la kdew ba ki don 31 ngut ki nongkitkam na ka bynta ka samoi treikam 2026-2028. Ka Mawlai Mandal ka kynthup 3 ngut ki Vice-President, 2 ngut ki General Secretary, 3 ngut ki Secretary, Treasurer, bad 20 ngut ki Executive Member.