Ka Meghalaya New and Renewable Energy Development Agency (MNREDA) ka la ioh pdiang ia ka SKOCH Gold Award 2026 halor ka Power bad Energy na ka jingpyntreikam ka sorkar Meghalaya ia ka Chief Minister’ Solar Mission ha ka Jylla. Ia kane ka khusnam la ai ha ka 20 tarik u Jylliew ha ka 108th SKOCH Summit- Public Policy Forum on “Regulatory Framework Viksit Bharat” ba la pynlong ha PHD Chamber Commerce bad Industry, New Delhi.Ia katei ka khusnam la shimti da ka Assistant Director ka MNREDA ka Kong Elizabeth Kharjana bad ka Accountant ka MNREDA ka Kong Audrey H Mukhim na bynta ka Directorate.
Kum ban shu kdew, ka Chief Minister’s Solar Mission ka dei da ka jingthmu ban weng ia ka jingduh bording bad ban pynkhlain ia ka jingioh bording ba lah ban shaniah lyngba ki kot teknoloji ba khuid bad ba iai neh. Ka skhim ka ieng ban pynkup bor ia ki longiing, ophis treikam bad ki karkhana da kaba ai ia ki Solar Hybrid Inverter System ha ki bor bapher ryngkat bad ki Solar Water Heaters, kiba la kyrshan da ka jingai subsidy ka jylla, ka jingnoh synniang kiba ioh jingmyntoi bad ka jingbei tyngka ki Bank. Palat ia ka 1.2 MW ka bording lah ban leh bad ka thong ba palat 10MW yn dang ban pyrshang ban pynurlong lyngba katei ka skhim.
Da kaba kyntiew ia ka jingpynbiang ia ka bording kaba lah ban iai bteng ban pynmih, ka mishon ka khmih lynti ba kan kyntiew ha ka jingshngain jong ka jingdon ia ka bording elektrik, ban pynduna ia ka jingshaniah ban na ki tyllong bording elektrik kaba la pyndonkam baroh shi katta ne Conventional Power Sources, ban pynbha iaka rukom im bad ban ialam shakhmat ha ka roi ka par ha ka imlang sahlang bad ka jingkiew ka ioh ka kot ha ryngkat bad ka noh synniang ha kaban pynneh pynsah ia ka mariang bad ban lah kyrda ia ka jingkylla ka suinbneng ha ka jylla.