Ki bor pyniaid District jong ka East Khasi Hills kin sdang ia ka jingleit rung ha man ki thliew iing naduh ka 30 tarik Jylliew ban pyntreikam ia ka Special Intensive Revision (SIR) kum ka sienjam ban pynshisha ia ki kyrteng jong ki nongthep Vote ha ka thup kyrteng thep Vote (Electoral Roll) ha baroh ki constituency ba hap hapoh ka District. Haba kren sha ki lad pathai khubor u Deputy Commissioner (DC), East Khasi Hills u Abhilash Baranwal ula kyrpad ïa baroh ki nongthep vote ba kin shimkhia bad ïatreilang ha ka jingpyntreikam ia ka SIR ka ban sdang naduh ka 30 tarik Jylliew bad yn bteng haduh ka 29 tarik Naitung. Ula ong kane ka jingleit rung thliew iing da ki Booth Level Officers (BLO) ka dei katkum ka jingbthah Election Commission India (ECI) bad kine ki BLO kin leit rung ha man ki thliew iing ba don ha baroh ki constituency ka East Khasi Hills. U la pyntip baroh 1,021 ngut ki Booth Level Officers (BLO) kin leit ha man la ka ïing ban sam ïa ki Self-Enumeration Form ba la dep pyndap lypa ïa ki nongthep vote ba don kyrteng ha ka Electoral Roll 2025. La kyrpad ïa ki paidbah ba kin pyndap hok ïa ki Form bad ai ti biang sha ki BLO.
U Deputy Commissioner ula kyntu ïa ki paidbah ba kin shimkhia ïa kane ka jingjurip hynrei kim dei pat ban sheptieng namar ka jingthmu jong kane ka kam ka long ban pynthikna ba ym don uwei u nongthep vote ban shah iehnoh ha kane ka jingpynrung kyrteng ïa baroh ki dei hok ban ioh thep vote.”Ka jingthmu jong ka Special Intensive Revision ka long ban pynrung ïa ki nongthep vote kiba dei hok kim dei ban duh,” ula ong bad ula bynrap ruh ba kane ka jingleit sha man ki thliew iing ka long ban pynbeit bad pynbiang ïa ka electoral roll khnang ba kan long kaba thikna bad khlem jingbakla. Ula batai ha ka por ba jinglum jingtip (enumeration) ym donkam satia ban aiti kino kino ki kot jingithuh. Ka kam ba ki nongthep vote ki hap ban leh ka long tang ban pyndap ïa ka self-enumeration form bad aiti sha u BLO. Tang ha ki katto katne ki khep ba donkam yn sa kyrpad ïa ki paidbah ban wanrah ïa ki kot jingithuh. Ka Election Commission ka la pynmih ka thup jong 11 tylli ki kot ban ïoh jingithuh kum ka jingai nuksa hynrei kane kam mut ba tang kita ki kot yn pdiang.U Deputy Commissioner ula ong, ba la bthah ïa baroh ki BLO ba kin pdiang ïa kano kano ka kot ba wanrah da ki nongthep vote, kynthup ïa ki certificate na Balang, na ki Rangbah Shnong lane kino kino ki kot ba don jingïa dei. Ka rai ba khatduh halor ka hok jong u nongthep vote ka shong ha u Electoral Registration Officer (ERO) hadien ba la bishar ïa baroh ki kot ki sla.Hadien ba kut ka jinglum jingtip, yn ai por shibnai ban pdiang ïa ki jingujor bad jingpynbeit bad hadien kata ki ERO kin bishar sa shi bnai ban shim rai shuwa ban pynmih ïa ka Final Electoral Roll ha ka 7 tarik Risaw 2026.
U Deputy Commissioner ula ong, ka 2005 Electoral Roll ka dei ka nongrim jong kane ka jingjurip namar ka dei ka sien ba khatduh ba ka Election Commission ka la pynlong ïa ka comprehensive revision jong ka electoral roll ha ka ri. La pyntip ruh ba ki paidbah ki lah ban pyndap ïa ka self-enumeration form lyngba ka website ka Election Commission India. Ki paidbah ba donkam jingïarap ki lah ban phone sha u BLO jong ki, lane sha ka 1950 Helpline ka Election Commission. Nalor kata, ka District Administration ka la plie ruh ar tylli ki helpline number ban ïarap ïa ki paidbah, kata 0364-2501255 bad 0364-2501228. U Deputy Commissioner ula kyntu ïa baroh ki samla ba la dap 18 snem bad ba dang 18 snem ym pat don kyrteng ha ka electoral roll ba kin pyndap ïa ka Form 6 ban pynrung ïa ki kum ki nongthep vote. Ki BLO kin wad ïa kine ki briew ha ka por ba ki leit jurip ïing sha ïing. U la pynshai ba kane ka SIR ka dei tang ban pynshisha ïa ki nongthep vote ba la don lypa ha Meghalaya. Kito ba wan kiwei ki na jylla bad kwah ban pynkynriah kyrteng sha Meghalaya ki hap ban pyndap ïa ka Form 8 bad ka jingtyrwa jong ki yn sa bishar katkum ki kyndon ba la buh.
Ula bynrap ki kyrteng ba lah ban shah weng na ka electoral roll ki long tang kito kiba la khlad noh kiba la kynriah shnong, kiba don ar sien ka kyrteng lane kiba ym dei ki nongshong shnong ba don hok katkum ka aiñ.Ban pynduna ïa ki jingsngewkhia paidbah, ka District Administration ka la pynlong bun tylli ki jingïalang bad ki Rangbah Shnong bad ki nongmihkhmat shnong ban pynshai ïa ka jingthmu jong kane ka jingjurip.Ha kaba kut, u Deputy Commissioner u la kyrpad ïa baroh ki paidbah ban ïatreilang bad ka sorkar bad la pynthikna ban ym don uno uno u nongthep vote ba dei hok ban shah iehnoh. “Ngim don jingeh lada phi kylli ïa ngi ïa kajuh ka jingkylli bun sien. Ka jingthmu jong ngi ka long ban ïarap man uwei pa uwei u nongthep vote uba don hok ba un lah ban pyndep ïa kane ka jingjurip khlem kano kano ka jingeh,” ula ong.