Hiar kynsan ka jingioh khajna, ba mab T.800 klur ka khajna kali na ka OTS

U Symbud Myntri Rangbah ka Jylla u Bah Prestone Tynsong hynne ka sngi ula ong, ka jingioh lum khajna ka Jylla ka la dei ban hiar kynsan hadien ba ka Sorkar ka la mab noh ia ka khajna ba T.800 klur ba pynsahteng da ki trai ki kali kamai lyngba ka One-Time Settlement (OTS) Scheme bad ula ai khublei ia ka seng ki trai trok bad nongniah kali halor ka jingshakri ia ki paitbah ka jylla ha ka leit ka wan. U Bah Prestone Tynsong ula kren ia kane hadien ba ka Joint Action Committee, kala pynkup burom ia u Myntri Rangbah ka Jylla u Conrad K. Sangma bad ia ki Symbud Myntri Rangbah kaba kynthup ia u Bah Prestone Tynsong bad u Bah  Sniawbhalang Dhar halor ka jingpyntreikam ka sorkar ia ka One-Time Settlement (OTS) Scheme ia ki kali kamai. Ula ong, ba ha ka jingialang jong ka kynhun myntri, u Bah Sniawbhalang bad ki ophisar ka tnad Transport kila ai jingbatai, kumta ka khajna jong ka sorkar ka lah dei ban hiar kynsan, namar na ka pisa T.1,100 Klur kaba dei ban siew kum ka khajna, kam dei satia ka mat kaba suk ne kaba lah ban shu map suk noh.

“Haba ngi lah iatai sani bha, hapoh ka jingialam u Myntri Rangbah, ngi la lah ban map noh palat T.800 Klur na ka T.1,100 Klur bad ngi khot ia kane ka scheme kaba kyrpang ka One-Time Settlement scheme” ong u Bah Prestone. Ha kaba iadei bad ka jingshah pynkup burom ki Nongialam Sorkar, u Bah Prestone ula ong, ka long kaba kham niar bha ban ioh ia kum kine ki prokram ha ka kam ai jingshakri ia u paitbah. Namar bunsien kiba don ha ka kam ai jingshakri ia ki paitbah bad kiba bat ia ki kyrdan ha ki ophis kidei kiba ju shah kynthoh, shah tim bad shah kynnoh. “Tang katto katne eh kiban ai jingiaroh ia kaei kaba ngi leh. Khublei shibun ia phi ki dkhot jong ka JAC ia kane ka jingai burom. Ngi da sngewnguh shisha bad phi lah ai mynsiem shisha ia ngi” ong u Bah Prestone bad ka ai khublei ruh ia ki trai bad nongniah kali ha ka kit ka bah bad ka leit ka wan da kaba ong, “Ngi ruh ngi sngewnguh ia ka jingai shakri ka jong phi baroh. Khlem ki trai kali bad kiba kit ia ki nongleit nongwan, ngam tharai ngi ngin lah ban poi sha ki shnong ki thaw. Phi long kiba kongsan bha ha ki lad ban kyntiew ia ka ioh ka kot jong ka jylla Meghalaya ka jong ngi.”

U la kyntu ia kiba donbynta ha kane ka kam ba kidei ban pyndonkam bha ia ka jingmap ia ka jingsiew khajna kum ka lad ba kin lah ban kiew bha shaphrang. “Kumta nga kyntu ia baroh ban shim ia kane kum ka kabu ksiar kaba la ai sha phi da ka sorkar bad nga ngeit skhem ba nangne shakhmat phin lah ban roi shuh shuh ha ka kam jong phi ha ka liang ka kit ia ki nongleit nongwan” ong u Bah Tynsong. Ula ong ruh ba ki nongialam ka sorkar kim dei satia kiban ym bakla shuh bad ki baroh ki dei hi ki briew bad wat nym pyrkhat ba kiba pyniaid ia ka sorkar, u Myntri Rangbah ne ki Symbud Myntri Rangbah kin ym leh bakla shuh, kumta kane ka rukom pyrkhat ka long kaba bakla bha. Ula ong ba ki donkam ban iatreilang da ka jingiajan na ka bynta ka bha ka miat jong ka Jylla Meghalaya hi baroh kawei.