Yn mihkhmat ka Aishwariya ia ka jylla ha ka jingiakob Miss Teen Diva

Ka samla Aishwariya Malang kaba dei na ka shnong Khliehiongriang, Jowai, kan sa leit ban mihkhmat ia ka jylla Meghalaya ha ka jingiakob Miss Teen Diva kaban sa long ha Jaipur.
Haba kren sha ki lad pathai khubor hynne ka sngi ka samla Aishwariya ka la ong ba ka jingai mynsiem bad jingkyrshan ki kmie ki kpa ia ka, ka la pyllong ia ka ban ioh mynsiem ban mih shakhmat na bynta ban iakhun ha ka rynsan thei bhabriew.
Ka samla Aishwariya ka la iathuh ba nyngkong haba sdang ia kane ka kam ka ju artatien ban rung sha ka rynsan iakop thei bhabriew, hynrei ka jingpynshlur jong ki kmie ki kpa ka la ai mynsiem bad bud ia ka jingkwah ka mynsiem jong ka bad kila nang pynskhem ia ka ha ka jingkyrshan.
Ka la ong ba ka jingiai iashim bynta jong ka ha kiba bun ki lympung iakob thei bhabriew ka la nang ai mynsiem bad pynshlur ia ka bad ka la iarap ruh ban kyntiew ia ka ha kiba bun ki rynsan iakop.
Ha man ki jingiakob, ka ju sngewthuh ba ka don ia ka jinglah jong ka ban iakob ha ki rynsan ha ri bad bynrap ba katkum ka jingshem jong ka , ka la nang iarap ban kyntiew shuh shuh ia ka ha kane ka kam.
Na ka liang kane ka samla ka la ai mynsiem ia kiwei ki samla kiba don ia ka jingthrang ba kidei ban don ka jingshaniah ha lade bad ka jingkut jingmut.
Ka la ong ba ka jingkyrshan jong ki bahaiing hasem ka long kaba donkam bha na bynta ban ioh ia ka jingjop bad la kyntu ia ki kmie ki kpa ba kidei ban don ha syndah jong ka jingthrang jong ki khun jong ki.
Ka samla Aishwariya ka la pan ka jingkyrshan na ki paidbah ka jylla Meghalaya.
“ Nga mihkhmat ia ka jylla ha ka grand finale jong ka Miss Teen Diva 2026, ka ban sa long ha Jaipur naduh ka 11 tarik Naitung haduh ka 19 tarik Naitung, 2026 bad nga kyrmen ba ngan lah ban wanrah burom ia ka jylla baroh kawei,” ong ka samla Aishwariya.