Kynduh ka KSU ia u MLA Ranikor, pynsngew 20 tylli ki mat jingdawa kynthup u Uranium

Ka Khasi Students’ Union (KSU) hynne ka sngi kala leit iakynduh ïa u MLA ka Ranikor Constituency Bah Pius Marweiñ, ban pynsngew ha u ïa ki “Arphew Tylli Ki Mat Jingdawa jong ka Seng” bad ban iaphylliew jingmut halor ka mat kaba iadei bad u Uranium khamtam haba ka thaiñ Domiasiat bad ki shnong kiba Marjan kidei kiba hap ha ka Ranikor Constituency. Ki nongialam ka KSU kila ioh ban iakren halor ki mat jingdawa jong ka seng bad khamtam eh ha kaban ia phylliew jingmut bad u Bah Pius Marwein halor ha ishu Uranium ba khih phaloh bha ha kine ki sngi namar ba u dei u MLA uba khmih ïa ki thaiñ Domiasiat bad ki shnong ba marjan kiba don ïa u marpoh khyndew u Uranium.

Ka Seng kala pynsngew halor ka jingioh thied jaka ki briew heh spah sha ki thaiñ ba don u Uranium ba dei hapoh kane ka constituency bad kala ïa kren halor ki mat pynroi ïa katei ka dong ka thaiñ kaba la shah ieh beiñ ha ka Sorkar kaba dei halor ka jingdonkam ki jaka sumar, ki skul, ka umbam umdih bad kiwei kiwei ba ki briew sah ha kitei ki thaiñ ki donkam bha. Ka la pynsngew ruh halor ka jingwan hiar khah khah ki briew ka Atomic Mineral Department (AMD) bad ki nongiarap ki jongka ban pyrshang ban thied bad pynsngewthuh bakla ïa ki briew ban ailad ban tih Uranium bad wat ban pyntieng pynsmiej ïa ki briew kiba pyrshah ban tih Uranium.

Ka KSU kala ban jur ruh ba lah donkam ban mynjur da ka Resolution ha ka iing Dorbar thaw aiñ ha kane ka Dorbar Lyiur ban wan, khang ban pyni ïa ka jingpyrshah sha ka Sorkar India ban tih ïa u Uranium bad ha kajuh ka por ban khanglad ïa ki briew ba wan thied jaka ba kin die pateng pat sha ki kompeni tih Uranium kum ka Uranium Corporation India Limited (UCIL).