Yn leit mihkhmat u Kitkupar ia ka India sha ka WCOPA ha Las Vegas

Ka long ka jingkmen bad sarong ia ka jaidbynriew bad ka jylla Meghalaya ha kaba u bah Kitkupar Nongsiej u nongjop jong ka Ka Sur Kynud Season 3, ka jingiakop rwai banyngkong eh ka jylla ba la pynlong da ka Don Bosco Media Network (DBMN), ula shah jied ban mihkhmat ia ka Ri India sha ka jingiakop rwai World Championships of Performing Arts (WCOPA) 2026 ha Las Vegas, USA ka ban sdang naduh 13 haduh 21 tarik Naitung, 2026. U samla Kitkupar Nongsiej u dei u khun jong u bah Aibari Kupar Syiemlieh na shnong Kynshi, Eastern West Khasi Hills.

Kum shibynta ban ai mynsiem ka Don Bosco Youth Centre (DBYC), Laitumkhrah ryngkat ka jingïatreilang bad ka Don Bosco Media Network & TV ki la pynlong ïa ka jingiaseng duwai bad kitbok hynne ka janmiet 8 tarik Naitung ha Tv Main Studio ha jingdonlang kiba haiing hasem, ki nongïalam Balang bad ki paralok kiba la duwai ba u Blei un kyrkhu U Blei ia une u samla nongrwai ban leit shim bynta ha ka jingiakop rwai WCOPA 2026. Ia ka prokram la pyniaid da u Rev. Fr. Micheal Makri, SDB, Director ka Don Bosco Youth Centre bad Managing Director ka Don Bosco Media Network, katba ki nongïalam jong ka Shillong Salesian Provincial, u Rev. Fr. John Zosiama, SDB ula shim ka bynta kum u Kongsan. Ha ka jingialang la ioh ka jingpule ia ki jingthoh bakhuid bad ka khubor ban ai mynsiem da u Rev. Fr. John Zosiamma SDB bad u Rev. Pastor A. I. Kharshiing kiba la pynkynmaw ia ka jingialang ba ka jingjop ba shisha ka long haba pyniasnoh ia ka sap bad ka jingsngewrit, ka jingminot, ka jingngeit bad ka mynsiem ban shakri.

La donlang ki kmie ki kpa jong u Kitkupar, ki hynmen ki para, kiba haïing hasem, ki dkhot ka seng Don Bosco Media, ki riew shemphang ha ki lad pathai khubor bad ki nongkyrshan ba la ïawan ban ai mynsiem bad ki jingkyrkhu kyrdoh.U Kitkupar u mih na Shillong ha ka 10tarik Naitung ha ryngkat u kpa, u Aibari Kupar Syiemlieh ban leit sha Las Vegas, ban ïashim bynta ha katei ka lympung iakop rwai ka pyrthei.