Da ka wait mait lynti jingsuk ai u Dolloi ha u MR ka Assam

Ki soo sngi le iaw jong ka Behdieñkhlam ka Seiñraij Jowai kaba la sdang naduh ka 6 tarik mynta u bnai kala poi noh sha kaba kut mynta ka 9 tarik hapoh ka syiem Aitnar hapdeng ka jingphuh jingphieng ki rot ki rong bala wanrah ha ryngkat ki khubor shaka imlang sahlang kiba iadei bad ka jingkordor ka khuid ka suba, ka jingdonkam ban pynneh pynsah iaka mariang, ban im ka jingim ba bha ba miat kiba iadei bad ka koit ka khiah, kumjuh ka lawei.

Nalor ki hajar ki paidbah ba wan sakhi ia kane ka Behdeiñkhlam la wan sakhi lang ruh u Myntri Rangbah ka Assam u Himanta Biswa Sharma, u Dy CM ka Meghalaya u Sñiawbhalang Dhar, ki myntri ka sorkar Jylla ba kynthup u Lahkmen Rymbui, u Sanbor Shullai, u Wailadmiki Shylla uba dei ruh u MLA ka thaiñ, nangta u Kyrmen Shylla MLA Khliehriat, u CEM ka Karbi Anglong Autonomous Council u Tuliram Ronghang bad kiwei.

Ha kane ka sngi hadien bala pdiang burom bad pynspong ia u Himanta daki nongialam ka Seiñraij Jowai naka liang u Dolloi ka Elaka Jowai pat u Puramon kynjing ula aiti ha u Himanta daka wait, ha kaba kane ka wait ka long kum ka dak ban mait lynti shaka jingsuk namar ba haki bynta khappud ka Jylla Meghalaya bad Assam barabor mih ka jingiakynad halor u pud u sam.

Haba iakren bad u Himanta halor ka jingwan sakhi jong u iaka Behdeiñkhlam u ong ba ka jingwan jong u ka long ban wanrah iaka jingsngew ia jan ia ieid bad ki paidbah ka jylla Meghalaya khamtam iaki paidbah ka Rilum Jaiñtia da kaba kyrmen ruh ba ka jinglehniam jong ki kan long kaba jop.

Haba kylli iaki kam khappud u ong ba naka por shaka por la don ka jingiakren bad u CM lem Dy CM ka Jylla Meghalaya bad haba don kano kano ka jingjia la lah ban ia pynbeit kloi daka jingdon iaka mynsiem sngew iajan sngew paralok.

Ha kajuh ka por u iathuh ruh ba un da biang ha kane ka Behdeiñkhlam Jowai, bad ban shim bynta shad hapoh ka pung Aitnar.

Kum ban pynkynmaw ka lehniam shad Behdeiñkhlam dei kaba la pynlong manla u snem halor ka nongrim ban beh iaka khlam, ka jingpang shitom bad ki jingsniew ba bunjait haka imlang sahlang da kaba ainguh aidem ia u Tre Ki Rot ba ha khlieh tam bad un theh ruh ki jingkyrkhu ha baroh ki liang.

Mynta ka sngi kaba dei ka sngi khatduh jongka Behdeiñkhlam naduh dang step la don ka jinglehniam bapher bapher kumjuh ruh ka Kyntiñ Khnong ha ïing Langdoh.

Haka nohphai sngi pat la wanrah iaki rong ki rot hapoh Aitnar bad la pynhiar ruh ia ka “Symbood Khnong” ka “Khnong Blai”.

Haka por ba pynhiar iaka “Khnong Blai” baroh ki khun ñiamtre kila iaknieh ban ioh ktah nyngkong daka jingngeit ban ioh iaka jingkyrkhu kyrdoh