T.187 klur yn tei karkhana shna shynrain Lakadong ha Thad Muthlong

Ka Sorkar Jylla hynne ka sngi ka la mynjur ia ka jingtyrwa ban thied jaka ba 3.972 acre ha Thad Muthlong, Laskein Block, West Jaintia Hills da ka jingthmu ban tei ia ka Integrated Lakadong Turmeric Processing Plant ne ka karkhana ban saiñ ia u shynrai Lakadong. Haba iakren bad ki nongthoh khubor hadien ba la wai ka jingialang ka Kynhun Myntri, u Myntri Rangbah u Conrad K Sangma ula ong, ka Sorkar Pdeng ka la bthah ia ki Jylla ka thain Shatei Lam Mihngi ba kin ithuh bad kyntiew ia uwei na ki mar ba pynmih na ki Jylla, kumta da kaba iasyllok bad ka DoNER Ministry, kumta ka jylla Meghalaya ka la jied ia u shynrai kum u mar rep.

U Conrad ula ong, ia kane ka Integrated Lakadong Turmeric Processing Plant ne ka karkhana saiñ ia u shynrai yn tei ha ka jinglut jingsep ba kot T.187 klur, da ka jingkyrshan ka Sorkar Pdeng, ha kaba ka DoNER Ministry bad ka Agriculture Minister ki la ai ia kaba bun ka pisa. Ula ong, kumba 70-80% na ka pisa ban pynlut ka dei kaba wan na ka sorkar pdeng, kumta kaba sah kata T.30-T.35 klur yn bei da ka Sorkar Jylla.

Ula ong, ba ka Kynhun Myntri ka la mynjur ban thied ka jaka ha ka dor kaba T.1.7 klur ban tei ia ka Integrated Lakadong Turmeric Processing Plant ban saiñ ia u shynrai Lakadong bad kumta ka jingdon jong katei ka karkhana kane ka long ka jingmyntoi ba khraw ia ki paid nongrep.