Mynjur ka Sorkar ban pynkylla ki kyndon tehkular Ban tei ia ka Orchid Resort Mawkasiang ha ka kyrdan 5 Star

Ka Sorkar Jylla hynne ka sngi ka la mynjur ban pynkylla noh ia ka kyndon jong ka jingiatehkular ne ka Amendment of Agreement da ka jingthmu ban plie lad ia ka Orchid Resort Mawkasiang, New Shillong ban tei ha ka kyrdan 5 Star. Haba iakren bad ki nongthoh khubor u Myntri Rangbah Conrad K Sangma, ula ong ba ki la shim ka rai bad mynjur ban pynkylla ia ka kyndon jingiatehkular ban plie lad ia ka Orchid Resort, Mawkasiang ban tei ha ka kyrdan 5-Star.

“Kumba phi tip ia ka Mawkasiang Orchid lah dep ban khot Tender ban ai Lease bad ka kynhun ba la ioh ia katei ka projek, ka la ioh ruh ia ka jingbit ban sdang ia ka kam ia ka jingtei, hynrei ka la don pat ka jingdawa ban ai lad ia ki ba kin bei tyngka bad ban pynlong ia katei ka jingtei ha ka kyrdan 5 Star, namar kumba long mynta kam dei satia ka jingpynlut na ka liang ka jong ki hynrei ka dei kaba la pynlut da ka kynhun shimet” ong u Conrad.

 Ula ong, ka Kynhun Myntri ka la pynthymmai ia ki kyndon iatehkular ka ban long kumba la ai sha ka jingtei ia ki 5-Star Hotel, kaba ki hap ban thep pisa ba T.5 klur kaba dei ka jingthep pisa ba tang shisien ne ka One Time Deposit bad ruh ia ka 4% na ka jingioh kamai yn hap ban siew sha ka Sorkar Meghalaya, ka MTDC. Kumta kitei ki kyndon kin dei shibynta ka jingiatehkular bad hadien ba la mynjur yn ai jingbit ia katei ka kynhun ban tei kum 5 Star.