Kyntait u Sing ban kyrshan ïa u kyrtong Bom ha ka ilekshon MP shiteng samoi

Ka Hills State Peoples Democratic Alliance (HSPDP) ne ka party Sing hynne ka sngi ka la kyntait ban kyrshan ia u kyrtong ka United Democratic Alliance (UDP) ha kane ka ilekshon MP shiteng samoi sha Lok Sabha ka ban sa long shen.

Haba kren hynne ka sngi, u President ka HSPDP u bah KP Pangngiang ula ong ba ha ka jingshisha ba ka HSPDP ka la kwah ban sei la u jong u kyrtong na bynta kane ka ilekshon MP shiteng samoi, hynrei namar ka jinglyngkot ka por kam lah shuh ban sei ia la u kyrtong bad la rai ruh ba kan ym kyrshan ia u kyrtong ka UDP namar ba kim iapoi ha ka jingsngew iamonlang.

Ula ong ba ha ka jingshisha ka HSPDP bad ka UDP ki don lang ha ka shatri ka Regional Democratic Alliance (RDA) baroh shitta bad ha ki ilekshon ba ladep kumba shisien arsien ki la kyrshan ruh ia u kyrtong ka UDP ha ka kyrteng jong ka RDA. Hynrei ha kane ka kynti mynta, na ka liang ka party, ka la kren shai ba kan ym kyrshan ia u kyrtong ka UDP u bah Vivanstone Kharngapkynta.

“Ka daw ba ngim kyrshan ka long hadien ba ngi ia pyrkhat sani bha ngi la kwah ban pynieng la u jong u symbol ka party, kaba ar ka long ba ngim iapoi ha ka jingsngew iamonlang ha ka RDA, ngi la pyrshang ba lada kan ia biang lang ia ki ar party ha ka RDA, ngin iabuh da u symbol ba iamonlang,” ula ong.

Ula bynrap, kane kam dei ka jingiapyrshah, hynrei kadei ka jingiakwah jong ka party hynrei ym shym lah shuh ban pynbeit namar ha ka por ba lyngkot, ka UDP ruh ka dang wad ia ki kyrtong ban ieng beit na ka party jong ki. “ Ngim ioh shuh ia ka lad ban ialeh lang ia u kyrtong ba iamonlang bad ngi la iakren da kaba suk da kaba sngewthuh ba ka RDA kan neh kan sah, namar kan peit na bynta ki ishu kiba khraw ka jylla,” ula bynrap.

Ha kajuh ka por, ula ong ba ka party ka la pyrkhat sani bha namar ba kim don ia u kyrtong bad ki iamon, ka party kan sa iasyllok bad kan sa ieh ha ka jingstad jong ki nongialam kumno ban kyrshan ia u MP ha ka ilekshon namar ba kim iohlad shuh ban pynmih ia la ujong u kyrtong.