Dawa ka KSU ban sangeh shna ia ka Food Court ha Felicitation Center

Ka Khasi Students’ Union (KSU) North Khasi Hills Unit hynne ka sngi ka la dawa ban pynsangeh shipor ia ka jingthmu ban shna ia ka Food Court ha ka jaka ba don ka Felicitation Center ha Umling, Ri Bhoi District.

Ia kane ka jingdawa ka KSU ka la pynsngew ha ka jingialang ba la khot da ka tnad Tourism Department haka jingdonlang, ki bor District Administration na Ri Bhoi, ki pulit, bad ki officer na ka tnad Transport.

Haba kren sha ki lad pathai khubor u President ka KSU North Khasi Hills Unit, u Samla Ferdinand Kharkhamni u la iathuh ba ia kane ka Felicitation Center ne ka Entry Point ha Umling la plie ha ka 21 tarik u Nohprah 2020, hynrei tang hapoh lai bnai ka la wan ka khlam COVID-19.

“Hadien kane, ka tnad ka Koit ka Khia ka la shimti ia kane ka jaka na ka bynta ki kam iada khlam, bad hadien ar snem, ka la pynphai biang ia ka sha ki bor District. Haba iohi ba ka tnad Tourism ka la ieh pathar ia kane ka jaka, ka KSU ka la khmih lynti ba kan don ka jingshna kaba bit ba biang namar ka la don lypa ka nongrim, hynrei ka tnad Tourism ha ki bnai dangshen ka la thmu pynban ban shna da ka Food Court ne Food Court” la ong u samla Ferdinald.

U samla Ferdinald ula ong ba naduh u snem 2023 haduh u snem 2025, kane ka jaka ka la shu sah khlem kano kano ka jingpyndonkam biang.

Ula ong ba KSU ka la ai jingmut ba ka sorkar ka dei ban buh da ka Tourism Information Center namar ka jingshna ka la biang lypa.

Haba kylli u nongialam ka KSU ula ong ba ki bor Sorkar ha ka jingialang ki la kular ban bishar bniah ia kine ki jingai jingmut jong ka KSU bad ban aiti ia ka Detailed Project Report (DPR).

“Hadien ba ngi ioh pdiang ia ki kot ki sla baroh ngin iakynduh ia u Myntri Rangbah ka jylla ban wad jingtip halor ka jingthmu ban pyntrei kam ia ka Meghalaya Residents Safety and Security Act (MRSSA) ha kane ka jaka” ula ong.