Lum jingialang u MR na ka bynta ka Baghmara Civil Hospital

U Myntri Rangbah ka Jylla u Conrad K Sangma hynne ka sngi u la lum ia ka jingialang ban khmih bniah ia ka jinglong jingman ki kam, ki jingtei bad ka jingai jingshakri ka Baghmara Civil Hospital, South Garo Hills.Ha kane ka jingialang la wan ban iashimbynta lang u Dr. Sampath Kumar, Additional Chief Secretary uba khmih ia ka Health and Family Welfare, Deputy Commissioner ka South Garo Hills bad ki heh ophisar jongka Health and Family Welfare.U Myntri Rangbah ula bthah ba ia baroh ki jingtrei bad ki jingtei dei ban shimkhia da kaba buh ia ki hakhmat bad ban ialeh ban pyndep kloi bad ban khmih bniah bha ruh ia ki.Ka Operation Theatre ha ka Hospital kala sdang treikam naduh u snem 2025 bad la pyndep ia 85 tylli ki jingleh surgery, kaba kynthup 42 sien ia ka Caesarean ne ka jingpuid ia ki longkmie kiba pun khun.

Ka hospital kala shakri ia ki 20,108 ngut ki nongpang kiba wan phah sumar bad ia 2,334 ngut ki nongpang kiba wan thiah pang ban ioh jingsumar ha 2025 bad kila don ruh 10,143 kiba wan phah sumar tang ha ka shiteng snem jong u 2026 kaba pyni ia ka jingdawa ia ka jingshakri.Ka don ruh ia ka Emergency Obstetric bad Caesarean, ka Transit Home kaba plie lad ia ki longkmie kiba pun khun kiba lah jan dei artad ka por kha ba kin sah bad ban ioh ia ka jingshah khmih bniah hashwa ba kin kha khun.Ki la don ruh 4 tylli ki jingtei kiba dang don ha ka lynti ne ha ka jingkhot tender jong ka hospital kaba la kot T.11.37 klur. Ka jingtei pynbha ia ka CHC kaba rim, mynta kadei kaba lah jan dep artad bad kala kynjoh sha ka 85 percent.Ka jingtei ia ka top um da ka tnad PHE kala dep kumba 70 percent, ka jingshna pynbha ia ki 25 tylli ki jaka sah na ka bynta ki doctor, ki nongai jingsumar bad ki nongtrei ka dang iaid shakhmat bad ki kam ha ka wat ka baar ban shna ia ka hospital kaba don 70 tylli ki jingthiah ia ki nongpang kadei kaba don ha ka lynti ban khot Tender noh.

Ha kane ka jingialang la khmih bniah ruh ia ka jingtyrwa ban kyntiew ia ka Chokpot Community Health Centre sha ka First Referral Unit, kaban don ia ki lad ai jingsumar bad ka jingkhmih bad jingsumar ia ki khunlung kiba dang shu kha, ka blood storage unit, newborn stabilisation unit bad kiwei kiwei.U Myntri Rangbah ula bthah ba ka jingthungkam ia ki Specialist dei ban ialeh ban pynkloi noh. Ka District Health Society ka lah dep pynmih ia ka jingpynbna na ka bynta ka kam Gynaecologist bad Paediatrician bad la shim ruh ia ki sienjam ban pynkhlain ia ki Specialist ha ka hospital, ki nurse bad kiwei kiwei.U Myntri Rangbah ula banjur ba kitei ki kam bad ki jingtrei kidei ban kylla long kiba lah ban shaniah, ka jingdon ia ka kyrdan ha ka jingai jingsumar ia ki paitbah ka South Garo Hills bad ula bthah ia ka tnad ka Koit ka Khiah ban bishar man la ka por ia ka jingiaid shakhmat jong kitei ki projek baroh.