Khuslai mynsiem ki nongdie jingdie ha surokbah National Highway

Ki nongdie jingdie harud surokbah National Highway naduh 3mer shaduh 7mer, kila sngewlynga bad dukha mynsiem hadien ba ka bor sorkar lyngba u Deputy Commissioner kila bthah ba kin sangeh noh ban die jingdie namar ba ka ain kam shah.Ka bor district ka la ai jingtip ba ki dei ban mih noh hapoh ka 15 sngi, lym kumta, kin wan ban leh ia kaba donkam.Haba kren bad kine ki nongdie jingdie mynta ka sngi, kila pynpaw ia ka jingsngewsih ba ka bor sorkar ka la hukum ia ki ban sangeh noh namar ba ki la sdang ia kane ka kam, ban kamai na ka bynta ban pyndap ia ka jingdonkam ha iing ha sem.

Ki la ong ba ki la wan die jingdie baroh shi sngi bad ki bam da miet ban pynbiang ia ka jingdonkam ka iing ka sem. Kila pynpaw ia ka jingshem jingeh ban mih namar ba kim don jaka bad kila dawa ba ka sorkar ka dei ban ai ka jaka kaba biang lada kam shah ha ka jaka ba ki die mynta.Ki la ong ba ka jingshngain ha kine ki shi lynter ki surok, ka don naduh ba ki wan shong die ki nongdie soh ha katei ka jaka, ki kali ki iaid da kaba jai jai bad kam shym la don kano kano ka jingjia aksident ne mynsaw.“Lada ka sorkar kam shah shuh ban die harud surok bad lada kim ai jaka ban kynriah hadien lane kim ai ka jaka kaba biang ban die, kin ym kynriah na katei ka jaka,” la pynpaw ki longkmie ba die soh.

Lah ban kdew ba ka bor district ka la pynmih ia ka jingbthah ba ym shah ban die jingdie harud surokbah naduh 3mer shaduh 7mer namar ba ka pynkhein ia ka Right of Way (ROW), katkum ka hukum ka Supreme Court.