Ujor ejahar ba pynpra khyrdop JHADC

Ha ka jingiadei bad ka jingleit tur ki kynhun sengbhalang ba kynthup ka JSU bad JNC sha phyllaw ka JHADC mynta ka sngi halor ka nongrim ban dawa na ka JHADC ban pyndam ia ka NOC ba la ai sha ka Shree Cement ba thmu khlong mawshun ha Lum Shyrman Elaka Nongkhlieh, nangta ban dawa weng ia u Dolloi Elaka Nongkhlieh da kaba kynnoh ba ma u lem ki dkhot Elaka ki la leh donbor ia ki jaka rep jong ki riew paidbah ha Lum Shyrman da kaba ai jubor sha ka Shree Cement, kaba la poi ruh sha u pud jong ka jingshah pynjulor ki artylli ki khyrdop ka JHADC.

Na ka liang u CEM JHADC bah Thombor Shiwat haba kren sha ki lad pathai khubor hadien ka jingiakhih jong kine ki seng u ong ba ka jingleh jong kine ki seng dei ka jingleh donbor namar ki la ktah bad pynjulor ia ki jingdon jingem ka Council, ha kajuh ka por ki la pyntieng pynsmiej ia ki nongtrei ka council bad pynthut ruh ia ka jingtreikam ka council.

U ong ka EC ka pynrem jur ia kaba kum kane ka rukom leh sha ophis treikam ka council ban wan thombor bad kim kwah ban iakren sngewthuh namar ma u lem ki dkhot EC ki don ha ophis treikam ha kane ka sngi.

Shuh shuh u la ong ka rukom leh jong ki ka pynpaw ba kim kwah iakren halor ka jingdawa bad imat ki shu kwah tang ban wan pynkulmar.

“Nyngkong ngi dang mut ioh ki kwah ban iakren bad ngi hynrei kim ong ei ei halor kata, pynban ynda haba ki pulit ki khang ia ka jingwantur ki pynibor da kaba kyrdem bad pynjot pynpra ia ka khyrdop bad hadien ba la rung shapoh phyllaw ki la pynjot pynpra sa ia ka khyrdop ban rung shapoh ophis treikam” ong u CEM.

Haba iadei bad kane u ong na ka liang ka EC ka la rai bad ujor file FIR pyrshah pyrshah namara ka jingleh beaiñ jong ki nalor ba kim pan jingbit bad ai jingtip ruh sha ka council, wat ka council ka kloi ban pdiang ban iakren sngewthuh jingmut.