Pan jingiarap u MR na ka sorkar pdeng ia ki project kad liengsuin

U Myntri Rangbah ka Jylla Conrad K Sangma ula kynduh ia u Myntri ka Sorkar Pdeng ba khmih ia ka Tnad Civil Aviation u Kinjarapu Rammohanan Naidu ha ka 21 tarik Naitung 2026 bad pan jingkyrshan na ka sorkar Pdeng ban pyntrei shakhmat ia ki project kad liengsuin da ka jingthmu ban pynkhlain ia ki lad pyniasoh lyngba ki liengsuin ha kylleng ka Jylla Meghalaya.

Ha man ki project, ka Sorkar Jylla ka la pyndep la ka bynta bad khlem ki jingai jingbit bad ki rai na ka Ministry kan nym shah ba kin iaid shakhmat.

Kaba hakhmat eh ka dei ka jingpynheh ia ka Shillong Airport ha Umroi. Ka Jylla ka la aiti ia ka jaka ba 22 akar sha ka Airport Authority India (AAI), ki environmental clearance ki la don bad ka AAI ka la aiti ia ka kam ban pynheh ia ka surok liengsuin (Runway).

Shisien ba la dep kine ki kam, ka jaka liengsuin ba kham jrong kan ai lad ia ki liengsuin ba kham heh kum ka A320 ka lah ban ai jingshakri ban pyniasoh ia ki liengsuin sha ki sorbah bad pynduna ia ka jingshaniah ha ka jingiaid lynti ba jngai lyngba ka surok na Guwahati.

U Myntri Rangbah ula kyrpad ia ka Directorate General Civil Aviation (DGCA) ban ai jingbit ban pyntrei kam khnang ban ioh sdang ia ka kam ban pyntrei bad ban jingweng ki jingwit ha ka jaka iaid ki liengsuin. Ka Jylla ka la pynlut na lade ban pynkhuid ia ki jingwit, kynthup ka jingpynkynriah ia ka Shnong Umden Mission ba T.150 klur bad ka la pynskhem ia kane ka jingkular ha khmat ka Iingkashari High Court ka Meghalaya.

Na ka bynta ka ri-lum Garo, ka Jylla ka la kyntu ia ka AAI ba kan shimti ban pyniaid ia ka Baljek Airport ha Tura kum ka Kad liengsuin ba pura ka AAI bad tyrwa na lade ia ka jinglut ka project ba kot T.63.67 klur.

Ia kane ka kad liengsuin la tyrwa ban pyniaid da kaba sdang da ka liengsuin ba 19 seat bad jam sha ka ATR-72 bad A320.

U Myntri Rangbah ula pan ia ka jingbei tyngka lyngba ka Regional Connectivity Scheme (RCS-UDAN), ha kaba yn sa pynphai pat ia ka jingkynshew mar ia ai jingmynjur ia ka project.

Ar tylli ki heliport ha Shillong bad Tura lah dep ban mang pisa bad ka jingpyntrei ka dang iai shakhmat. Ka Jylla ka la ithuh sa khyndai tylli ki jaka ha ki district Headquarter bad ki jaka jngohkai bad pan ia ka jingiarap ban bei tyngka ia kumba ar tylli na ki napoh ka RCS-UDAN ryngkat bad ki jingwad bniah ia ka jinglah ban pyntrei ia ki baroh ki project.

Hadien ka jingpyni ia ka jingtreikam ki liengsuin duriaw ba la pynlong ha pung Umiam ha u bnai Naiwieng 2024, ka Jylla ka la pan ruh ban bei tyngka ia ka jaka hiar liengsuin ha um (water aerodrome) ha Umiam hapoh ka RCS-UDAN bad ka jingpynkhreh ia ka detailed project report, kaba tyrwa ia ka Umiam kum kawei na ki san tylli ki ‘aerodrome’ ba la bynshet ha ka AAI ba kan pyntrei.