Ka sorkar kan iaid shakhmat ia ka Public Hearing ka Shri Cement Ltd

Ka Sorkar Meghalaya ka la rai ban ïaid shakhmat ia ka Public Hearing ba la buh ban long ha ka 31 tarik Naitung ha East Jaiñtia Hills, wat hapdeng ka jingpyrshah ki kynhun bapher ia ka Shri Cement Ltd.

U Symbud Myntri Rangbah ba khmih ia ka tnat kam pohiing (Police) u Bah Prestone Tynsong ula ong ba ka Sorkar ka la bthah ïa ki bor district ban long ba husiar bad ban pynthikna ba ka shongsuk shongsaiñ kan neh ha baroh ka jingïaid jong ka Public Hearing.

U Bah Prestone u la ong ba la dep ai jingbthah shai ïa u Deputy Commissioner bad u Superintendent of Police ban peitngor ïa ka jinglong jingman.

“Ngi la dep bthah ïa ka district administration ban long kaba husiar bad ban pynïaid bha ïa kane ka kam. Ka jingkhuslai jong nga mynta ka long tang halor ka shongsuk shongsaiñ, hynrei ngi la dep ai jingbthah ba dei ban pynthikna ba ka ain bad ka suk ka saiñ kin neh ha kano kano ka rukom,” la ong u Bah Prestone.

Haba kylli balei ba ka sorkar ka dang ïaid shakhmat bad ka Public Hearing wat hapdeng ka jingpyrshah, u Symbud Myntri Rangbah u la ong ba ym dei tang kawei ka liang kaba dei ban shah sngap, hynrei don ruh kiba bun kiba kyrshan ïa ka projek.

“Lada phi pule tang ïa kawei ka liang, phin ïohi tang ïa kiba pyrshah. Hynrei don ruh kiba bun kiba dawa ba dei ban ïaid shakhmat bad ka projek. Kumta ym dei ban peit tang ïa kawei ka bynta,” u la ong.

Ula ban jur ba ka Public Hearing ka long kaba kongsan namar lyngba ka jingïohsngew ïa ki paidbah yn lah ban shim ïa ka rai kaba dei bad u la ong ruh ba ka jylla ka long kaba sngewkhia ïa ka mariang, hynrei ki kyndon jingïada ïa ka mariang ki dei kiba la buh da ka sorkar pdeng bad ki long kiba tyngeh.

“Ka Public Hearing ka long kaba kongsan bha. Ka jylla ka sngewkhia ïa ka mariang kumjuh kum ki paidbah. Ki aiñ bad ki kyndon jingïada ïa ka mariang ki long kiba shai bad ngim lah satia ban pynkhein wat tang kawei ruh ka kyndon,” ula ong.

U la ong ruh ba ka sorkar ka hap ban peit lang ïa ka roi ka par ka ïoh ka kot ha kaba ula iathuh ba bun ki shnong ha East Jaiñtia Hills ki la ïoh jingmyntoi na ki karkhana dewbilat kiba don ha katei ka thaiñ.

“Ki nongïalam shnong ki la ïathuh ha nga ba ki karkhana ki la ai jingmyntoi shibun ïa ki shnong. Ki jingïatreilang hapdeng ki company bad ki Dorbar Shnong ki long kiba bha bad ki company ki la kyrshan ruh ïa bun ki kam pynroi shnong,” u la ong.

Haba kylli halor ka jingkynnoh ba la pyndonkam palat pud da ki bor pahara, u Tynsong u la ong ba un sa pan ïa ka kaiphod shuwa ban kren eiei halor katei ka bynta.

“Nga dei ban ïoh shwa ïa ka Kaiphod bad hadien kata ngan sa ai ïa ka jubab halor kane ka bynta,” u la ong.