Ka jingkynnoh ia ka Meghalaya ka daw ka jingshlei um ha Assam kam don nongrim: Prestone

U Symbud Myntri Rangbah ka Jylla u Bah Prestone Tynsong ula ong ka jingkynnoh ka Assam ia ka Meghalaya ka dei ka daw jong ka jingshlei um, kam dei satia kaba shong nongrim khlem da bishar bniah ia ki daw tynrai.

Haba kren sha ki lad pathai khubor u Bah Prestone ula ong, “Phi donkam ban leit da lade bad peit. Ka jingshlei um kam shym la jia ha ki jaka lum. Ki jia ha ki jaka them”.

“Lada don ka rukom pynïaid um (Drainage System) ba biang bad ka jingtei ïa ki jingdonkam paidbah ba la thaw bha, kan ïarap shibun ban pynduna ïa ka jingshlei um,” la ong u Bah Prestone.

Ula bynrap ba ym don briew ba lah ban tip lypa haduh katno ka jingïoh slap kan long, kumta ym lah ban pyndep lut ïa baroh ki jingeh ba mih na ki jingkylla jong ka mariang.

“Man ka por ka ju don ka jingkynnoh ïa ka Meghalaya tang namar ba ka jylla ka don ha ki jaka lum katba ka Assam ka don ha ki jaka ba kham shapoh. Hynrei ym lah ban shu kynnoh ïa ka Meghalaya, kumjuh ruh ka Meghalaya kam lah ban shu kynnoh ïa ka Assam. Ngi baroh ar jylla ngi dei ban shim lang ka jingkitkhlieh ban wad ïa ki lad jingïada bad jingïarap,” ula ong.

Ula ong ba ki Consultant ba la thung da ka Sorkar Jylla lane ka Sorkar Pdeng ki dei ban kynthup ïa kine ki bynta haba pynkhreh ïa ki projek kam pynroi ia ki paidbah.

“Ki Consultant ki dei ban shimkhia ïa kine ki bynta. Ka drainage system ka dei ban long ba biang, ki nala um ki dei ban shna katkum ka jingdonkam. Kine ki bynta la dep ban kynthup ha ki projek ba dang wan,” ula bynrap.