Kyrshan skul ka KSU ia 40 ngut ki khynnah na ki longiing ba duk

Ka Khasi Students’ Union (KSU) Mawbah Unit ka la pynlong ia ka jingialang ban kyrshan da kaba siew ka bai skul sha ki 40 ngut ki khynnah pule kiba pule ha Mawprem Presbyterian Secondary School.

Kine ki 40 ngut ki khynnah ki dei kiba wan na ki longïing ba duna ha ka ioh ka kot hynrei ki kwah shisha ban bteng ia ka jingpule da kaba leit skul ha Mawprem Presbyterian Secondary School.

Kane ka jingkyrshan da kaba siew bai skul, ka dei ka jingngangnud bad ka thong jong ka KSU ban kyntiew ïa ka pule ka dangle bad ban iarap ïa ki kmie ki kpa ba mad ïa ki jingeh ha ka liang ka pisa.

Haba ai jingkren ha ka jingialang, u Principal jong ka Mawprem Presbyterian Secondary School ka la pynpaw ka jingsngewnguh ïa ka KSU bad ka la iathuh ruh ba ha u snem 2025, ka KSU ka la lah ban ai jingiarap ia kumba 20 ngut ki khynnah skul.

U Principal ka la pynpaw ba ka Mawprem Presbyterian Secondary School naduh ba la seng ïa ka, ka buh ia ka thong ban ïarap ia ki longiing kiba duna ka ioh ka kot ban phah skul ia la ki khun.

Ula ong ba ka bai skul kam dei kaba heh hynrei ka dei tang T.450 shisnem naduh Class Nursery bad T.800 ia ki Class X bad ka kitbok kitrwiang ïa ka KSU ba kan nanglah ban ai jingshakri ba bha tam na bynta ka shnong bad ka imlang sahlang bad ia ka Ri bad Jaitbynriew.

U Rangbah Shnong Shnong Mawbah, u Bah Arisstone Thabah u ai ka jingiaroh ïa ka KSU Mawbah unit, kiba la lah ban pynurlong ïa kane ka jingthmu ban ïarap ban kyrshan ïa ki khynnah Pule ba wan shisha na ka longïing ba duk, kiba donkam shisha ïa ka jingkyrshan ban bteng ïa ka pule jong ki.

Na ka liang u Education Secretary ka KSU u Samla Alerick Kharjana, ula ong ba u dap da ka jingsngew kmen wat la ka skul ka shim bai skul ba rit tam ruh hynrei u iohi ba skul ka dang bteng ban treikam.

U la ong ba ka KSU ka don shibun ki skul ha kylleng ki bynta ka bri u hynñiewtrep, kine ki skul baroh ki dei ki skul ba ka union baroh kawei ka don la ka jong ka jong ki management Committee ban kyrshan ia ki khynnah skul kiba wan na ki longiing ba duna ha ka ioh ka kot.

Ha Kane ka sngi, la ïa don ryngkat naduh u Samla Alerick Kharjana uba dei u Education Secretary, KSU CEC, u Principal ka skul u Babu Theo Laloo, u Rangbah Shnong ka shnong Mawbah u Bah Arisstone Thabah, ki Nongialam ka KSU Mawprem Circle bad kiwei ki Nongialam ki dkhot ka seng.