Ka VPP kam pdiang ia ka ‘Public Hearing’ ka Shree Cement u Lum Syrman

U nongialam ka Voice of the People Party (VPP) u bah Ardent Miller Basaiawmoit ula ong ba ka party kan ym lah ban pdiang ia ka Public Hearing jong ka projek tih mawshun jong ka Shree Cement ba long ha u Lum Syrman, Daistong, East Jaintia Hills.
Haba kren sha ki lad pathai khubor, u bah Ardent ula ong ba lada ka sorkar ka khuid shisha ha ka rukom pyrkhat shwa ba kan ai ia ka jingbit, ka pyllong ia ka Public Hearing ban sngap ia ka jingsngew bad ka jingpynsngew jong kiba bun. Namar kata ka dei ka kamram ka sorkar ban thew ia ki jingpynsngew jong kiba pyrshah bad kiba iaishah.
“Ngim lah ban pdiang ia ka kaiphod bad ngim pdiang ia ka Public Hearing, dei ban pynsahngeh namar kam shym la iaid katkum ka nongrim ain,” ula ong.
Shuh shuh ula bynrap, lada ka sorkar ka sngewthuh ba don ka jingpyrshah jong ki paidbah ka bym shong nongrim, ka dei ka kamram jong ka sorkar ban pynsngewthuh ia ki paidbah. Hynrei kam shym la ailad bad kaba sngewsih ka long ba ka la don ka jingiatih surok ha katei ka jingpynshai paidbah.
“Kadei ka kamram jong ka sorkar ban sngap ia ka jingsngew bad ka jingpynsngew jong kiba pyrshah bad kiba iaishah. Ka sorkar kadei ban thew ia ki jingmyntoi bad ki jingduhnong na ka jingwan kane ka karkhana,” ula ong
U bah Ardent ula buh jingkylli ruh ia ka sorkar, ba ia kito ki samla kiba sngewkhia ia ki kam bamsap bad ka jingtrei torti ia ki surok, ki khlie ia ka surok da ka kti ki shah ai ejahar. Katba ia kito kiba tih khnang ban pynsiew ia ka surok ha ka public Hearing, ka sorkar ka la leh aiu.