Phra hajar ki briew ki iap na ka jingdih duma ha jylla man u snem:Dr. ND Mawrie

Ka World No Tobacco Day (WNTD’26) Campaign ka la sien jam ban pynlong ia ki jaka pule ba lait na ka jingpyndonkam u duma ne Tobacco Free Educational Institutions (ToFEI) lyngba ka jingiatreilang ki tnad sorkar, ki jaka pule, ki kynhun imlang sahlang bad ki shnong ki thaw.Ha ka WNTD’26 man ki skul bad kolej la bthah ba ki dei ban leh ar tylli ki kam kynthup ban pynlong ia ka Rally pyrshah duma bad ban pynlong ‘Signature Campaign’ da kaba lum ia ki jingsoi na kiba haiing hasem, ki para marjan, ki paralok bad ki nongshong shnong.Ka Jylla Meghalaya ka la ioh rekod kum ka jylla ba ioh lum bun ki skul bad kolej ban iakhun pyrshah ia ka jingpyndonkam ia u duma, ha kaba 9,312 tylli ki skul bad 55 ki kolej ki la iashim bynta ha ka World No Tobacco Day (WNTD’26) ba la pynlong hapoh ka mat “Tobacco! Business of DEATH” naduh ka 6 tarik u Iaiong haduh ka 10 tarik u Jylliew mynta u snem.

Ki khynnah pule ki la ioh lum haduh 25 lak tylli ki jingsoi na ki shnong bad palat 6 lak ngut ki samla pule ki la iashim bynta ha ki jingiaid paitbah ba la pynlong ha kylleng ka jylla.U State Nodal Officer, ka NTCP Meghalaya u Dr. Nabaneeta D Mawrie ula ong,”U Duma um tang ba shim ia ka jingim jong kiba pyndonkam hynrei u buh jingma ruh ia ka mariang. Ki la don 47% na ki samla ba 15 snem shaneng ha ka Jylla ba la pyndonkam ia u duma, ka la lam sha ka jingiap ki 8000 ngut mynsiem briew ha jylla man snem. Ngi ieng skhem ban pyntreikam ia ki sienjam ka ToFEI ban iakhun pyrshah ia ka jingdih duma”.

Kumjuh ka State Project Director, SEMAM Samagra Shiksha, Meghalaya ka Richa Kulkarni ka la ong, “Ban tei ia ka Meghalaya kaba lait na ka jingpyndonkam duma ka donkam ia ka jingshimkhia ban iai neh, ka jingiatreilang bad ka jingiashim bynta lang ki jaka pule”.Ka la bynrap ka jingshim bynta ki 9,312 ki skul ha ka WNTD’26 Campaign ka pyni ia ka jingshim khia jong ki skul ban sain dur bad ai jingtip ia ka bha ka miat ki pateng ban dang wan.