Ngi tip la ka bor ka buit ha ka saiñ pyrthei, kyrmen ngin poi sha ka jingjop:Prof. Batskhem

Da kaba pynpaw ïa ka jingskhem shuwa ka ilekshon MP shiteng samoi na Shillong Parliamentary Seat u kyrtong ka Voice of the People’s Party (VPP), u Prof. Batskhem Myrboh ula ong, ba ka Party ka dang pynleit jingmut ha la ka jong ka bor sain pyrthei bad pan ka jingkyrshan na ki paidbah ban poi sha ka thong jingjop.U Prof Batskhem ula pynpaw ïa ka jingsngew skhem ba ka VPP kan jop ïa kane ka ilekshon bad kan dang bat ïa ka Seat ha Lok Sabha kaba la thylli hadien ka jingkhlad kynsan u MP Lok Sabha bad nongïalam rangbah ka VPP u Dr. Ricky AJ Syngkon ha u bnai Rymphang. Ula ong, ba ka jingïalap ilekshon jong ka Party ka long katkum la ka jong ka jingïohi jngai, ka bor jingïatreilang jong ka seng bad ka jingkyrshan jong ki paidbah ym namar ki kyrtong jong kiwei pat ki seng saiñ pyrthei.

Ula bynrap ka jingïalap ilekshon ka Party ka shong ha ki buit treikam ban ioh jingkyrshan na ki paidbah.”Ngi pynleit jingmut ha la ka jong ka saiñ pyrthei bad ngi tip ïa la ka jong ka bor. Ngi ïaid katkum kata bad ngi ngeit ba ngin sa mih paidbah kum ki nongjop ha kane ka ilekshon Lok Sabha” ula ong.”Ngi tip ïa la ka jong ka saiñ pyrthei. Ngi tip ïa la ki mat jingïakhun, la ka jong ka bor bad la ki jong ki buit treikam. Kumta ngam ïohi kano kano ka jingma. Kumba nga la ong, ngi skhem ba ngin jop ïa ka ilekshon” ula ong. Da kaba pynpaw ïa ka jingkiew stet jong ka VPP ha ka thaiñ Khasi-Jaiñtia Hills, u Prof Batskhem ula ong, ba ka jingkyrshan ïa ka Party ka wan na ka jingsngewthuh ïa ki nongrim, ki polisi bad ka jingaiti jong ka Party ban wanrah ïa ka saiñ pyrthei ba khuid bad ban peit ïa ka bha ka miat ki paidbah.

“Ki paidbah ki ai jingkyrshan ka seng VPP namar ki sngewthuh ïa ki nongrim ka seng, ki polisi treikam jong ka bad ka jingaiti jong ka ban wanrah ïa ka saiñ pyrthei kaba khuid bad ban ïada ïa ka jingmyntoi jong ki paidbah ka jylla. Halor kane ka nongrim, nga ngeit ym tang ba ngin lah ban bat ïa ka nongrim jong ka jingkyrshan, hynrei ngin dang lah ruh ban pynbun ïa ka jingdon jong ki nongkyrshan ka seng,” ula ong.