Rai pynrem ka iingbishar ban set phatok 20 snem bad kuna mar T.1 lak ia 2 ngut

Ha ka 11 tarik Nailur, 2024, ki Pulit ka Mawshynrut ki la ïoh pdiang ïa ka FIR na ka nongujor ba la pyntip ba ka para jong ka, ba dang 17 snem ka rta, ka la shah rahbor bad shah leh beijot ha u bah Francis Iawphniaw bad u bah David Syiemlieh.Ia kane ka jingjia, la register ïa ka mukotduma ha Mawshynrut PS Case No. 18(9)2024 hapoh ki kyndon 5(g)(k)/6 jong ka POCSO Act, ryngkat ka Kyndon 137(2) jong ka Bharatiya Nyaya Sanhita (BNS). Ïa kane ka mukotduma la tohkit da ka WPSI Batlarity Dkhar, hadien ba la pyndep ïa ka jingtohkit ka la aiti ïa ka charge sheet pyrshah ïa ki arngut ki nonglehkam sniew katkum ki kyndon ain.

Ha ka 31 tarik Naitung, 2026, ka Ïing kashari jong u Special Judge (POCSO), Nongstoin, hadien ba la bishar bniah ïa baroh ki sakhi ki sabut ba la wanrah ha ka jingtohkit, la lap ba ki don bynta ha kane ka kam runar bad ka la rai pynrem ïa u Francis Iawphniaw bad u David Syiemlieh.Ka Ïing kashari ka la hukum ban set phatok 20 snem ia baroh arngut (Rigorous Imprisonment – RI), ryngkat ka kuna mar T.1,00,000 (ShiLak Tyngka) ki dei ban siew na ka bynta ka kam runar hapoh ka Kyndon 6 ka POCSO Act. Lada kim lah ban siew ïa ka kuna, kin shah set phatok suk (Simple Imprisonment) sa shi snem.

Nalor kata, na bynta ka kam runar ba hap hapoh ka Kyndon 137(2) jong ka Bharatiya Nyaya Sanhita (BNS), ka Ïingkashari ka la rai pynrem ban set phatok 6 (Hynriew) snem, ryngkat ka kuna mar T.50,000 (Sanphew Hajar Tyngka). Lada kim lah ban siew ïa kane ka kuna, kin shah set phatok tam sa shi snem.