Byrthen ïakhih ka KSU lada ym urlong ki 5 tylli ki mat jingdawa, kynthup ban pyndam ïa ka public hearing ka Shree Cement

Ka seng Khasi Student Union haka jingleit pynshai paidbah jong ka ia 5 tylli ki mat jingdawa naka sorkar Jylla ba ka dei ban pynurlong hapoh 15 sngi, da kaba sdang mynnin ka sngi na Mawkyrwat South West Khasi Hills, mynta ka sngi pat ka la hiar pynshai ha Khliehriat East Jaiñtia Hills District haka jingialang bala pynlong hakhmat u mot Kiang Nangbah hajan ka ophis u DC East Jaiñtia Hills District, ba la ia don lang naduh ki nongialam ba hakhmat ka KSU Central Executive Council ba kynthup u President ryngbah u Raymond Kharjana, u General Secretary Ruben Najiar, ki dkhot ka KSU napoh West bad East Jaiñtia Hills.

Ki mat dawa ki kynthup ban pyndam noh shi syndon iaka public hearing ka Shree Cement kaba la pynlong haka 31.07.2026 bad ban suspend ia u DC bad SP ka East Jaiñtia Hills kumjuh ruh ki ophisar ka MSPCB, namar ba ha katei ka public hearing kiba pyrshah kim shym la iohlad shim bynta ban pynsngew iaka sur jongki naka daw ka jingshah khang lynti bad shah thombor haki bor pulit bad ki gaang ba kyrshan iaka Shree Cement, kaba la poi ruh sha u pud ka jingmynsaw briew bad julor ki kali.

Nangta ka mat halor ban pynurlong noh iaka Meghalaya Residents Safety & Security Act (MRSSA) 2016, ban pynurlong iaka jingpynkylla (amendment) iaka Meghalaya identification, registration (safety & security) of migrants workers act 2020, ban pynbeit iaki jingeh haka rukom thungkam ka NEIGRIMHS katkum ki jingkular, ban pynlong ka rukom thungkam ba shai ba khuid da ka ban pynduh noh iaka personal interview, ban wanrah jingkylla haka MPSC, DSC kumba la ai jingmut ka seng da kaba thaw iaka standard operating procedure naka bynta baroh ki recruitment board.

Bad halor kane ka mat jingdawa ka KSU la wan ban ai jingkyrshan ruh da ki nongialam sengbhalang na kiwei pat ki seng, ka Hima Sutnga Youth Federation, ki nongshong shnong ka Shnongrim, Daistong bad kiwei.

Napdeng kiba ai jingkren ha kane ka sngi ki mat ba ki nongkren ki kham ban jur dei halor ka public hearing ka Shree Cement bala dep pynlong dangshen ha Lum Syrman, Elaka Nongkhlieh East Jaiñtia Hills District, ha kaba ki nongkren napoh ka Hima Sutnga Youth Federation, ki nongshong shnong ka Shnongrim bad Daistong kila iathuh iaka jingshahktah jongki lyngba ka jingwan ka Shree Cement bad kila pynkynmaw ruh iaki jingjia bala jia ha lynti haka por ba ki mut leit shaka public hearing ban pynsngew iaka jingpyrshah.

Naka liang ka KSU lyngba u president bad general secretary ka central executive council haba kren halor kine ki mat jingdawa, ki ong ba da lei lei ka seng kan ym pyndem lymda ka sorkar ka pynurlong ia baroh 5 tylli ki mat, bad ka sorkar kan hap mad iaka jingiakhih jongka seng haki rukom bapher bapher.

Ki ong ruh kumba napdeng ki 20 tylli ki mat ba ka seng kala phah shaka sorkar hadien bala dep pynskhem iaki dkhot ba thymmai ka CEC, mynta ki jied ban pynurlong mar dor shwa ia 5 tylli ki mat namar ki sngewthuh ba kine ki long kiba kham suk iaka sorkar ban leh lada ka don ka mon.

Ha kane ka sngi naka liang ka President jongka Meghalaya Indigenous Women’s Council kong Bythygrace Dkhar haba wan ai jingkyrshan ia kane ka mat jingdawa ka KSU, kala pynsngew ruh iaka jinglap jingshem jongka haka sngi ba pynlong iaka public hearing ka Shree Cement, da kaba ong ba ha katei ka sngi ki paidbah kila mad iaka jingsohsat naka jingshah thombor haki bor pulit bad kiba kyrshan iaka public hearing, bad wat kiba pang ba shitom ruh kila shem jingeh ban leit shaki jaka ai jingsumar namar ba ka u surok ruh la tih.