Ka Khasi Student Union (KSU) hynne ka sngi ka la pynlong ia ka jingiaid paidbah da ki ar shaka ha ryngkat ki lama iong ban pynpaw ka jingpyrshah halor ka jingleh mynthi ka Sorkar ban pynurlong ia ki 5 tylli ki mat jingdawa.
Ia ka jingiaid paidbah da ki ar shaka, ka KSU ka la sdang na Jaiaw lyngba ka surokbah Shillong-Guwahati, Dhanketi, Nongthymmai, Rynjah, Umpling, Nongmensong, Saw Furlong, Polo, Golf Link bad pynkut biang ha Jaiaw.
Ha kane ka jingiaid paidbah ka KSU, la ioh jingtip ki la don katto katne ngut ki bar Jylla ba la shah shoh hynrei haduh mynta ym pat lah ban pynshisha katno ngut ki briew ba shah shoh bad mynsaw.
La ioh jingtip kawei ka kali sorkar Bolero ba don ia u number ML01-6152 ka la shah thang ha Mawlai Nongmali, ka kali kit mar jong ki shipai ba don u number JH02BB7485 ka la shah pynpra ha Polo, kawei ka kali Scorpio ba don u Number MLO1A-4444 ka la shah kawang maw.
Kiwei ki kali ba shah pynjulor ki kynthup ML05-AC-7081, ka kali jong ka National Informatics Centre, AS 01ES 8243, AS 11AH 5190, ML 01 5620 bad ka ML 01 A 0966.
Lakhi ka jingshah pynjulor ki kali sorkar jylla bad sorkar pdeng, ki kali bym dei number Plate ML, ki kali bad ar shaka jong ki briew bar Jylla.
Ha ka por iaid Rally ka KSU, la sakhi ba bun ki dukan jong ki bar Jylla ha kylleng ka nongbah Shillong ki la khang mynta ka sngi.