Ngin Ym Pyndem, Ngin Ia Khun Haduh Da Jop | Khot Ka AKMTTA Ïa Ki Nongñiah Kali Ban Ai Jingkyrshan

Ka All Khasi Meghalaya Tourist & Taxi Association, lyngba u President, Bah Ricaldinus Dohling, ka la pynpaw ba ka Association kan dang bteng ban khang bad pyrshah ïa ka jingrung jong ki kali Assam sha Shillong, katba ki nongñiah kali kiba dei ki trai jylla ki dang ïakynduh jingeh bad jingshah pynthud.

U Bah Ricaldinus Dohling u la ïathuh ba ka Association kan bteng ïa kane ka jingkhang ïa ki kali Assam haduh ban da don ka jingïakren bad ki nong Assam halor kane ka mat.

U President ka Association u la kyntu ruh ïa kiwei ki jaitbynriew kiba kamai kali hapoh Meghalaya, kynthup ïa kiba kamai hapoh sor bad shabar sor, ban ai ka jingïatreilang bad ka Association. U la kyntu ba lashai kin sangeh noh ïa ka kamai, la ka dei kiba kamai hapoh jylla ne shabar jylla ban Pynpaw kum ka dak jong ka jingïasnoh kti bad kane ka jingïakhun.

U Bah Ricaldinus u la ong ruh ba lada don kiba ïaid lait ïa kane ka jingkhot jong ka Association, ka Association kan ym bahkhlieh ïa kano kano ka jingjia kaba lah ban mih ha lynti.

Ha kajuh ka por, ka Association ka khot bad wer ruh ïa baroh ki nongkamai kali kiba dei ki trai jylla ban wan ai jingkyrshan bad jingïatreilang, da kaba sangeh ïa ka kamai lashai ka sngi, bad wan ban ia Snohktilang bad ka Association namar ka ia khun ba kin ïoh ka jingïada na ka jingshah ñion ne jingshah lehbor ha ki briew kiba nabar jylla.

Shuh shuh, u President u la ïathuh ba ka jingbat ïa ki kali Assam ha bynta ka jingkieng Damside kan dang bteng. U la pynpaw ba wat lada ka long ban sah miet ha katei ka jaka, ka Association ka long la kloi ban bteng ïa kane ka jingkam.

Ka All Khasi Meghalaya Tourist & Taxi Association ka la pynpaw ba kan ïengskhem halor kane ka mat bad kan bteng ïa ka jingïakhun haduh kaba kut, da ka jingthmu ban ïoh ïa ka jingjop bad ban ïada ïa ki nongkamai kali kiba dei ki trai jylla na kano kano ka jingpynibor ne jingshah leh donbor.