Plie helpline ka Mehalaya ban iarap kiba sah ha Nepal

Palat 350 ki briew ki la iap na ka jingjia shlei um ha Nepal kynthup na India bad kumba 288 ngut ki nong India kiba jah rngai, katba 200 ngut kiwei pat ki dang sahkut sha ki bynta jong ka ri China na ka jingjia sylllad umsaw ba shyrkhei hynnin ka sngi Balang ha Rasuwa District ba don khappud ka Ri Tibet.

Ha kane ka jingjia ki shikurim na US ba dei ki nong India u Deepak bad Madhu Ahuja la iohi khadduh ha Saga, Tibet ha kaba ki kynduh ia u Sadhguru rungkat kynhun Yatra shwa ban hiar khappud Nepal.

Ka ri China ka la maham ba lah ban shlei um biang ha ki sngi ban wan, namar ki don ki pung ba don jingma namar ki dak orpait bad ki lah ban twa ha kano kano ka por.

Ka Tnad bar ri ka iathuh hynne ka sngi, la ioh ban pyllait im 21 ngut ki briew na Tamil Nadu, kiba leit sha ka Kailash Mansarovar Yatra ha Nepal.

Ha kajuh ka por, ka Sorkar Jylla ka la kyrpad ia ki paitbah ba kin ai jingtip lada don kino kino ki briew na Meghalaya kiba jah ne ki bym ioh shuh ban iakren ha Nepal.

Ha kane ka jingjia hynnin ka sngi Balang bun ki briew ki la iap bad jah rngai hadien ba ka umsaw ka la rat ia ki iing bad ki jingdon jingem, ki surok, ki jingkieng bad kiwei kiwei.

Ka Sorkar Jylla ka la pan jingtip na ki paitbah ioh don ki nongshong shnong na Meghalaya kiba jah lane ym ioh jingtip shuh ia kiba haiing ne paralok ba sah ha Nepal.

U Executive Director ka State Disaster Management Authority, ula kyntu ia ki ba haiing hasem, ki paralok, ki travel agency/tour operator bad ki paitbah ba don jingtip kin sngewbha ban pyntip sha u Helpline/Emergency Contact Number-6009924512 lane ha u Emergency-112/1070 bad CM Connect-1971.

Ula kyrpad ia ki briew kiba phone ba kin ai ia ki jingtip ba pura kynthup ka kyrteng bad snem, Contact Number, jaka sah ha Meghalaya, ka jaka ba ki don ha Nepal, ka tarik bad por ba ki ioh shuh ban iakren ia ki, ka kyrteng bad jingtip jong kiba haiing ba ha sem ne nongpyntip, khnang ba yn ioh ban lum ki jingtip bad ban phah sha ki bor ba dei khmih ban leh ia kaba donkam.