Kular u James Sangma T.20 lak ia ka Seiñraij Mukhla ban pynbha ia ka Aitnar

U MP Rajya Sabha u James K Sangma ha ba leit sakhi kum u kongsan ia ka shad niam Behdeiñkhlam ka Seiñraij Mukhla mynta ka sngi, ha ryngkat ka jingdonlang u myntri ka koit ka khiah bad sports ka sorkar Jylla u Wailadmiki Shylla uba dei ruh u MLA ka thaiñ, kumjuh ki ophisar sorkar, ki khlieh nongialam niam bad Seiñraij bapher bapher ula pynpaw ka jingsngewnguh bad iaroh ia ki paid ka Seiñraij Mukhla kumjuh ki nongshong shnong ba marjan halor ka jinglong jop kane ka shad niam Behdeiñkhlam bad ruh ka jinglah jong ki ban pynneh pynsah iaka riti dustur.

Bad ong ruh kane dei lyngba ka jingtrei shitom lang ka imlang ka sahlang.

Haba u phai sha ka dorkhas ba la aiti da ka Seiñraij Mukhla halor ka jingdonkam jong ka ban kyntiew bad tei pynbha pynmiat shuh shuh ïa ki sawdong sawkun ka pung Aitnar kaba dei ka jaka ba juh pyndep ia ka Behdeiñkhlam man la u snem ha ryngkat ka jingwan sakhi u paidbah ba bun ba lang na kylleng, u James Sangma ula kular ban ai T.20 lak tyngka ban iarap ia ka jingthmu ka Seiñraij Mukhla.

U ong ruh kumba ia ka Behdeiñkhlam la sdang ha ka nongrim ban beh iaka khlam, ka pang, ka shitom bad jingsniew ba bun jait haka imlang sahlang, mynta kala wanrah ia ka jinglong iatylli kawei ha ka imlang sahlang, bad long ruh ka bor ban lah pynjem iaki jingeh ha ka imlang sahlang.

U la kyntu ruh ïa ki samla ban sumar bad ban iada ia ka riti dustur, na ba ka long ka dak bad ka tynrai jong ka jinglong-briew manbriew, khnang ba kane ka dustur kan bteng sha ki pateng ban wan.

Shwa kane u Wailadmiki Shylla ula pdiang burom ia baroh kiba wan sakhi ia kane ka Behdeiñkhlam khamtam ia u kongsan Jame K Sangma, da kaba u ai ruh ki kyntien kyrkhu kyrdoh ba kane ka Behdeiñkhlam kan wanrah jingkyrkhu ha ki liang baroh naduh ka koit ka khiah, ka kamai kajih bad kiwei.

Ha kane ka sngi pynkut ia ka Behdeiñkhlam hapoh pung Aitnar, ki khun ka Seiñraij Mukhla ha ryngkat ka shad kmen ka kynhoi risa kila pynpoi ia ki rot ki rong hapoh ka pung Aitnar ryngkat ki khubor shaka imlang sahlang.