“Ka sorkar ka dei ban pynkhreh ki lad iada lynshop mariang katkum ka juk stad”

U Nongialam ka Liang Pyrshah Dr Mukul Sangma, ula ong ba ki jingjia shlei um, jingther u lapbah lap san bad ki jingjulor ba shyrkhei ba la jia ha Nepal, Uttarakhand, Himachal bad Assam, ki dei ban pynpeit mat ia ka Jylla Meghalaya ban shim ia ki sienjam katkum ka jingstad saïan ban pynkhreh ia ki jingpynjulor jong ka bor mariang.

U Dr Mukul ula pynkynmaw ba la thaw ia ka Disaster Management Act, 2025 ka dei hadien ba la pynlong ia ka jingiasyllok ba bniah bha hadien ba ki la mih ki jingjia ka jingwan lynshop ka bor mariang kynthup ia ka jingkhie u jumai ha u snem 1897.

Ula ong, ba ka aiñ ka la batai kumno ka thaiñ shatei lammihngi ka lah ban shah ktah lada mih ki jingjia jong ka jingpynjulor ka bor mariang bad dei ban don ia ka Disaster Management Plan kaba bniah bha ha ka kyrdan jong ka Sorkar Pdeng bad Sorkar Jylla.

Ula ong, haba shna ia kano kano ka prokram kaba iadei bad ka kam pynroi, dei ban hap pyrkhat bha khnang ban pynthikna ba kino kino ki jingtei ki dei kiba la tei ba kin lah kyrda bad ka ong ba ki kyndon tei jingtei na ka bynta ki jylla lum kum ka Meghalaya kadei ban hap pynrung ia ka kyndon ba lah ban iakhun pyrshah ia ki jingpynjulor ka mariang bad ia ki DPR dei ban khmih bniah hashwa ban ai ia kano kano ka jingmynjur.

U Dr Mukul ula ong, ba ka Meghalaya kala wanrah ia ka State Disaster Management Plan kaba don ia ki bor treikam kaba khlain, ha kaba ki bor District kiba la khlieh da ki Deputy Commissioner, State Authority da u Myntri Rangbah bad ki Executive Commmittee da u Chief Secretary bad ka jingpyndonbynta lang ia baroh ki tnad.

“Phim lah ban ialeh pyrshah ia ka bor mariang, ha Guwahati ka wah Brahmaputra kaba khlain ka la tuid sha ki bynta ba shatei bad ki lum ha ki bynta ba shathie. Ka um kan iaid na ki jaka them. Ki lynti iaid ka um bala pynwandur da ka mariang la kidei ki wahduid, ki nala ne ki wah, ki dei ka hok jong ka um ban iaid ha ka por ba jur slap” ong u Nongialam ka Liang Pyrshah haba iakren bad ki nongthoh khubor hynne ka sngi.

Ula ong ruh ba ka Jylla Meghalaya kala mad ia ka jinglong ka suinbneng ka bym ithuh ithaw bad ki jingther kynsan u lapbah lapsan namar ka jingkylla ka suinbneng, kumba jia ha ri-lum Garo ha u snem 2014 bad kaba la jia ruh dang shen dang shen ha ka Jylla Uttarakhand bad ha Ri Nepal.