Iap ki sniang ha Jylla ba ioh rung laitlan ki sniang bar jylla, dawa bailutksan ka HFU

Hadien ka jingud jingnam jong ki nongrep na ka daw jong ka jingiap pathar jong ki sniang ha ki bynta bapher bapher jong ka South West Khasi Hills District ha kine ki khyndiat bnai na ka jingsaphriang jong ka jingpang African Swine Fever (ASF), ka Hills Farmer Uinon (HFU) Central Body hapoh ka jingialam u Bah Commander Shangpliang, President ha ryngkat ki dkhot napoh ka District mynta ka sngi ka la hiar jurip ia kiba bun tylli ki shnong ha ka thain Shiliang Um Rilang ban iakynduh markhamat bad ki nongrep bad ban iohsngew dalade na ki nongrep.

Ka HFU ka la sdang ïa ka jingjurip jong ka ha ka thain Shlliang Um Rilang naduh ka shnong Nongbrei Nongdom, Mawthong, Mawsep , Rangblang ter ter shaduh Umdohlun bad ha ka jingjurip ki nongrep ki la pynpaw ia ka jingduhnong kaba khraw namar ka jingiap khlam jong ki sniang namar bun na ki nongrep kane ka dong ka thain ki im bad phah skul ia ki khun ki kti lyngba ka kam ri sniang.

Haba kren sha ki lad pathai khubor, u Bah Commander u la ong ba ka seng ryngkat ka jingiatreilang bad ki Rangbah shnong ka la pyrshang ban lum ïa ki kyrteng jong baroh ki nongrep kiba la iap sniang ym tang hapoh kane ka distrik, hynrei ha baroh ki District hapoh ka jylla khnang ba kan ioh ban leit rah hakhmat ka sorkar na ka bynta ban dawa ïa ka bailutksan .

“Ki nongrep ki donhok ban dawa ïa ka bailutksan namar ba ka sorkar kam shym la sngap satia ia ka jingdawa jong ka seng ban buh ïa ki jaka test ïa ki sniang kiba wan na bar jylla, kiba la ioh ban rung laitluid khlem da peit la kidei kiba koit ba khlain ne kidei ki sniang kiba pang, bad kum ka seng ngi suba jur ruh ba ka jingsaphriang jong kane ka jingpang Swine Flu kadei hi na ka jingiohrung laitlan ki sniang bar jylla,” ong u Bah Commander uba la bynrap ba kumba ka sorkar ka siew bailutksan ia ki bar jylla, ka HFU ka khmih lynti ba kan leh kumjuh khamtam eh na ka bynta ki nongrep trai jylla.

Kumta ka seng HFU ka dawa jur ïa ka sorkar ba kadei ban buh noh ia ka jaka test ia ki sniang kiba wan nabar, ban pynbiang noh ia ka dawai injek ban iada ia ki sniang kiba dang im bad ban pynbiang ruh ïa ki nongtrei kiba lah ba leit ai injek ia ki sniang ba dang im ha manla ki shnong hapoh ka jylla.