Leit jurip u Bah Sanbor bad Bah Paul ban shna surok hajan TB Hospital

U Myntri ka Sorkar Jylla u Bah Sanbor Shullai bad u MLA ka Shillong West Constituency u Bah Paul Lyngdoh hynne ka sngi, ki la leit jurip ia jaka kaba don ha Reid Provincial Chest Hospital ne kaba la tip kum ka TB Hospital kaba don ha Upper Mawprem, Shillong na ka bynta ban shna noh ia ka surok ha ka jinglut jingsep kaban kot T.12 Klur.

Hashwa ban pynlong ia ka jingjurip ia katei ka jaka, u Bah Sanbor bad u Bah Paul Lyngdoh kila lum ia ka jingialang bad ki heh ophisar na ki tnad sorkar bapher bapher ban pynthikna ba ka jingpyntrei ia kane ka projek kan long kaba iaid beit iaid ryntih na ka bynta ban pynsuk ia ka leit ka wan jong ki paitbah.

U Bah Sanbor ula ong, “Nga lah iakren bad u Bah Paul man la ka por, khamtam haba ka surok ha Mawbah ka long kaba rit bha bad sharum jong kane ka surok ki don ki lum jingtep bad ki lum jingthang jong ki jaidbynriew bad ki niam bapher bapher. Ngi lah shim ia ka seinjam ryngkat bad u MLA ka thain u Bah Paul Lyngdoh, ka tnad ka koit ka khiah, ki nongialam na ka Dorbar Shnong Mawbah bad Nongsohphoh ban iatreilang bad na ka liang ka tnad ka koit ka khiah kala mynjur ban ai ia ka jaka ban shna ia ka surok. Kumta kan pynsuk ia baroh ki paitbah ha ka leit ka wan khamtam ha ka por ba ki leit on tep ne leit on thang ba kin ioh ban iaid na kane ka surok” la ong u Bah Sanbor Shullai.

U Myntri Sorkar ula ai khublei ia ka tnad PWD bad khamtam ia u Executive Engineer u Bah S Lytep uba la khlad noh dang shen, uba la shimkhia bha ia kane ka kam ban thaw ia ki lad bad ban khmih bniah ban ioh shna ia kane ka surok.

Ula ong, ba ka tnad pwd ka lah dep ban pynkhreh ia ka Estimate bad ia ka DPR bad la phah sha ka ophis jong u Chief Engineer bad ha ka taiew ban wan, u Engineer uba thymmai un sa wan ban shimti noh ia ka kam bad yn sa pynlong ia ka jingialang halor kane ka projek.

“Ma nga bad Bah Paul ngin sa leit ban tynruh ia ka Tnad Planning bad Finance bad ngin ialeh katba lah ha kaban pynsted ban ioh noh ia ka bhah tyngka khnang ban ioh shna noh ia ka surok kaban ai ka jingiarap ia ki nongleit nongwan khamtam ia kiba leit ontep bad onthang ia ki baieid bathoin ki jongki” ong u Myntri Sorkar.

U Bah Sanbor ula ong, ia kane ka surok kaba jrong 400 mitar tam bad jingiar ka surok ka long 7 mitar shiteng, yn shna ha ka jinglut jingsep kaba kot T.12 Klur kaban kynthup ia ka jingmadan ia katei ka jaka, jingshna ia ki nala, ki kynroh bad ban siang rong.