Pynsngewthuh ki pulit halor ki kam thok, jingdih buaid bad shongkha khynnah

Ka Barato Police Outpost mynta ka sngi haka rynsan pynsngewthuh paidbah iaki khynnah skul ka St Peter’s Higher Secondary School ha shnong Barato kala batai pynshai ruh halor ki kam thok shukor tyngka, kumjuh ka jingdih ki kynja pynbuaid, bad ka jingshongkha khynnah.

U incharge ka Barato Police Outpost u SI D. Pale, bad u SI R. Suiam, Second Incharge kila shim iaka bynta ai jinghikai ia ki khynnah skul halor kine ki phang bad kumba 200 ngut ki khynnah skul ki la wan shim bynta ha kane ka rynsan.

Haba kren halor ki kam thok kam shukor tyngka (financial fraud), u SI D. Pale u la pynsngewthuh ia ki khynnah shaphang ka jingma kaba jur kaba wan lyngba ki jingthok digital (digital scams), kaba kynthup ia ka ‘Digital Arrest Scams’ bad ka jingtuh ia ka identity (Identity Theft).

U la pynshai ruh ia ki rukom kiba ki nongshukor ki ju pyndonkam bad u la sneng ia ki khynnah ban bud ryntih iaki lad jingiada khnang ban iada ia lade na kine ki kam thok tyngka online

U la pynsngewthuh ruh ia ki khynnah halor ka jingma ba shyrkhei naka jingdih ki kynja pynbuaid (drugs abuse), da kaba kyntu ruh ban kiar na ki jingpynshoi kiba sniew bad ban shim ia ki rai kiba don ia ka jingkitkhlieh.

U SI, Suiam pat u la kren halor ka phang ka shongkha khynnah (Child Marriage), da kaba pynshai iaka jingsniew bad jingma ba ap ia ka jingim, kynthup ka pule puthi, bad ka lawei jong ki khynnah. U la pynshai bad kdew ruh ia ki kyndon ki ain kiba donkam ban iada pyrshah naka jingshongkha khynnah.