Pynkup burom ka NEAU, Khliehtyrshi ia 299 ngut ki samla pule

Ha ka 5th Convocation Exercise Class of 2026 jong ka North East Adventist University, Khliehtyrshi West Jaiñtia Hills District, ki 229 ngut ki samla bala pyndep iaka jingpule graduates haki tnat pule bapher bapher ba kynthup ha ka BA Political Science, English, History, Education bad Sociology. Ha ka MA English, History, Education, Political Science bad Sociology kumjuh ha ka Bsc nursing, B.com, BBA, DMLT and BSCMLT ki la shah pynkup burom haka jingialang ba la pynlong mynta ka sngi ha Auditorium kane ka University, ha kaba u A.L.Hek MLA Pynthormukhrah Constituency ula wan sakhi kum u kongsan ryngkat ki jingdonlang ki nonghikai, nongpyniaid kane ka University nalor kiba shah khot sngewbha bad kiwei.

Ha kane ka sngi ka University kala pynkup burom kyrpang ruh iaki 6 ngut ki samla kiba poi shakhmat haka result jong ki ba kynthup ka Sawahaka Dan Master of Arts Education, ka Dahunshisha Sukhlaiñ Master of Arts Political Science, ka Pretty Dkhar Bachelor of Business Administration, ka Larisa Lamin Bachelor of Arts Political Science, ka Melody Laldintluangi Bachelor of Science, Life Science bad ka R. Vanlalmalsawmi Bachelor of Arts Sociology.

U kongsan A.L.Hek kum u kongsan haba ai jingkren u pynpaw ka jingsngewkmen ban ioh donlang ha kane ka sngi bad haba ai khublei Kitbok kitrwiang ia baroh kiba shah pynkup burom, u kyntu ruh ban long ki khun ba tip briew tip blei kata ban ieid para briew bad ieid ia u Blei.

U sngewkmen ruh ban tip ba ha kane ka jaka pule ki khynnah dei kiba wan na kylleng ki Jylla ka Ri, bad u ngeit skhem ruh ba ki sngewtynnad ban im hapoh kane ka Jylla Meghalaya ba itynnad, ha kaba ula pynpaw ruh ka jingsngew sarong ba u long u nongshong shnong ka Meghalaya.

Haba ai mynsiem iaki khun samla ba shah pynkup burom u ong, ha ka jingim hap mad shibun ki jingeh bad ka jinglah jong ki ban poi haduh kane ka khyllipmat mynta ka sngi ruh dei lyngba bun ki jingeh ba kila iaid lynti sahdien, ha ryngkat ka jingtrei shitom ki kmie ki kpa.

“Haka jingim hi lada khlem ki jingeh yn ym lah ban jop ne poi shaka thong, bad haka jingim teng teng i kum ymdon lad shuh, hynrei lada don ka jingngeit ha u Blei ma u hi ban pyni ki lad ki lynti kumno ban jop baroh ki jingeh”. Ong u bah Hek.

U bynrap da kaba ong, baroh phi don la ka jong ka jingthmu nangne shakhmat, kumta ha kano kano ka lynti ba phi iaid manla ka sngi, lane haka kam ba trei dei ban long kiba sngewthuh bha ialade, namar kum ki briew ym lah lait na ki jingtynjuh, bad haba lah ban teh la kam ialade yn sa lah ban pyniaid iaka jingim lade haka lynti ba bha.

Kumba nangne shakhmat dang jrong ka lynti ba kin iaid u kyrmen ba kin long jop ha kano kano ka lynti ba ki iaid.

Naka liang u Ch.John Victor Chancellor, NEAU haba kren ai mynsiem iaki samla u ong “Teng teng haka jingim ngim lah ban ioh lut ia kaba kwah, hynrei long kiba iaishah ban thom iaki jingeh daka jingtrei shitom jingshlur, ka jingshaniah ialade da ka ban iaid beit shakhmat ha ryngkat ka jingdon jingkyrmen ba wat lada ym lah ban jop haba sdang ruh hynrei yn sa lah hi ban poi haka thong”.

“Phi dei ka lawei jongka Ri bad haka jingim lehse phin ym lah ban biang lut nadong shadong hynrei pyni iaka jinglong hok haka jingim, leh kaba bha tam, ieid iaki para briew, ieid ia u Blei, burom ia lade bad burom ia kiwei ha kaba ka bainong jongka jinglehbha kan sa wan hadien”. Bynrap u Ch.John Victor.

Nangta la ioh ruh ka jingrwai, jingtem sur tynrai, pule bible bad kiwei kiwei.