12 tarik yn rung BJP u Dr. Jemino bad ki nongkyrshan, lah ban bud sa kiwei ki MLA

U Dr. Jemino Mawthoh, u General Secretary barim ka United Democratic Party (UDP) bad u MLA barim ka Nongthymmai Constituency ula shim ka rai ban leit iasoh noh sha ka BJP ha ka 12 tarik u Nailur, 2026 ryngkat ki nongkyrshan jong u.

Kane ka long hadien shisnem ba ula mih na ka seng UDP, u Dr Jemino ula pynlong ka jingialang iamir jingmut bad ki nongkyrshan kiba la pynpaw ban bud lang lada u rung sha ka BJP, namar ka jingangnud jong ki ban ioh ki kam pynroi hapoh ka Nongthymmai Constituency.

Kum ban pynpaw ka jingleit rung jong u Dr Jemino sha ka BJP ka don ka jingthmu na shalyndet, kata ban iakhun ia ka MP ilekshon Lok Sabha shiteng samoi na Shillong Parliamentary, namar haduh mynta ka BJP kam pat pynbna kyrtong ban iakhun ilekshon shiteng samoi katba kiwei ki party ki la iaid shakhmat kum ka VPP, NPP bad ka Congress.

Lah ban pynpaw ka jingleit iasoh u Dr Jemino sha ka BJP ka la ktik ia kiwei ki MLA jong ka UDP ban leit iasoh bad ka BJP bad ka jingiakren ka dang iaid shakhmat lada biang ki jingdawa ki urlong, kata ban pynrung ia ka ktien Khasi ha khyrnit baphra ka riti synshar ka ri bad ban pyntreikam ia ka ILP ha Meghalaya.

Ka sain hima hapoh ka seng UDP ka lah ban kylla bad wat ha ka jylla, lada ki MLA ka UDP kumba 9 ne 8 ngut ki leit iasoh sha ka BJP shwa kane ka ilekshon MP shiteng samoi ban wan.