Sei soh ka jingïalang ka sorkar Meghalaya-Assam bad ka seng ki nongñiah tourist

Ka jingialang hynne ka sngi hapdeng ka sorkar Meghalaya bad Assam ryngkat ki seng kali kamai na jylla Meghalaya bad Assam, ka long kaba seisoh.

Ha kane ka jingialang ka sorkar Assam bad ka sorkar Meghalaya ki la mynjur ba kin weng ia ki jingeh ba la mad da ki kynhun kamai kali na ki ar tylli ki jylla, khnang ban pyntikna ban don ka jingiaid beit jong ki kali.

Ia ka jylla Meghalaya ha kane ka jingialang la mihkhmat da u Symbud Myntri rangbah u bah Sniawbhalang Dhar katba na Assam la ialam u Myntri ka tnad Border Protection u Atul Bora ryngkat 7 tylli ki seng na Assam bad 5 tylli ki seng kali kamai na Meghalaya.

Haba kren hadien ba wai ka jingialang, u bah Sniawbhalang ula ong ba ka jingialang ka la rai ba ka sorkar Assam kan ai jaka ieng ia ki kali kamai bad ki painkhana na Meghalaya ha Airport.

“ Ka jingialang ka long kaba seisoh ha kaba baroh artylli ki kynhun ki la mynjur ba kin iatreilang ban weng ia ki jingeh,” ong u bah Sniawbhalang.

U bah Sniawbhalang ula ong ba ki la rai ban don ka Joint Committee ban iadon lang ki Commissioner na kine ki jylla baroh ar tylli ryngkat ki nongialam ki seng kali kamai na bynta ban khmih bniah ban pyntikna ba kin ym iakynduh jingeh haba iaid ba ieng ha kino kino ki jylla.

Ula ong haba iadei bad kiwei ki jingeh kum ka jingdon ki dalal ne ki agent, yn pynbeit da ki sorkar halor kane ryngkat ki seng ki kali kamai.

Na ka liang u Atul Bora ula pynpaw ba ka dei ka jingialang kaba sngew tynnad bad kaba seisoh ha kaba baroh ar tylli ki sorkar kin shim ia ki lad ki lynti halor ki jingeh ki kali kamai jong baroh ar tylli ki jylla.

U Atul ula ong ba ka jinglong jingman mynta ka la jai jai bad kam don shuh kano kano ka jingujor na kino kino ki liang.

Katba na ka liang u Anirban Goswami u nongialam ka Tourist Taxi Association na jylla Assam, ula ong ba ka sorkar Assam ka ladep pynbeit ia ki jaka ban ieng ki kali kamai ha Airport.

Ula ong ba baroh ar tylli ki kynhun kamai kali na Assam bad Meghalaya, ki mad ia kajuh ka jingeh bad baroh ar tylli ki sorkar ki la mynjur ban shimkhia haba iadei bad ka jingkharoi ki dalal ne ki agent ban pyniaid thep briew ia ki kali kamai ha Assam bad Meghalaya.