Da ka drama lyngkot la pynsngewthuh paidbah halor ka jingpang klongsnam bad kiwei

Kum shibynta ka World Physiotherapy Day, ka tnat Physiotherapy jong ka North East Adventist University, Khliehtyrshi ryngkat ka jingiatreilang ka Meghalaya Branch Physiotherapy Welfare Association mynta ka sngi kila hiar ha Ummulong CHC, West Jaiñtia Hills District ban ai jingsumaar ei bad ban pynsngewthuh paidbah halor ka jingpang stroke, jingpang klongsnam kiew BP, shini, kiew khleiñ bad kiwei da kaba pynlong ruh ka drama lyngkot bala shim bynta daki samla pule NEAU kumjuh ruh ki jingkren batai pynshai naki doctor haba iadei bad kane ka jingpang.

Haka jingialang pynsngewthuh paidbah la donlang naduh u Medical Officer incharge Ummulong CHC u Dr. Pura Pakma, nangta ka Dr.Junita Kyndait Head of the Physiotherapy Department North East Adventist University, u Dr.Hamboy Langbang napoh Meghalaya Branch Physiotherapy Welfare Association bad kiwei.

Ha kane ka sngi ka Dr.Junita kala batai iaka jingdonkam ka jingsumar physiotherapy ia kito kiba ioh pang stroke hadien bala biang ka jingiaid ka snam haka met khnang ba kin lah ban im biang kumba juh long naka bynta ban pynbit pynbiang ialade naduh ban bam lade ban sum ban sait bad kiwei. kumjuh ruh kumno ka physiotherapy ka iarap bad iada ban lait na kine ki jingpang.

Ka kyntu ruh ba haba don ki dak ki shin kum ka jingkynriang durkhmat, tlot ki kti ki kjat, thud kren dei ban leit mih mar mar shaki jaka ai jingsumar haka por ba biang.

U Dr. Pura Pakma haba kren ula ban jur halor ka jingdonkam ban iada khnang ban lait naka jingpang stroke jingpang klongsnam bad kiwei, da kaba kyntu ban im bha im miat naduh ki jingbam jingdih ba man ka sngi.

Ula pynkynmaw ruh ba ka jingmlien ban dih kyiad, dih siket, bam kwai, bam duma, bam iaki jait jingbam bala dep pynshna haki rukom bapher bapher ki buh jingma iaka koit ka khiah bad lah ban lam sha kine ki jait jingpang.

Nangta ula kdew ruh iaka jingpang cancer kaba ioh bha ki briew ha kane ka Jylla, ka daw dei na kine hi ki jait jingbam jingdih ba ki briew hapoh ka Jylla jong ngi ki mlien.

Haba bynrap iaka jingdonkam ban im bha im miat u kyntu ruh ba kito ba don bp don shini ki dei ban sumar bha da kaba phah peit bniah iaka koit ka khiah manla ka por khnang ban ym poi sha u pud ka jingioh stroke ne fail kidney.

Kumba ka phang jong kane ka sngi dei halor ka cardiovascular disease and stroke naka liang ka Dr.Junita Kyndait kumjuh napoh Meghalaya Branch Physiotherapy Welfare Association kila ai ka jingbatai bniah halor kane ka phang.

Ha kane ka sngi naka liang ki samla pule ka tnat Physiotherapy ka North East Adventist University, Khliehtyrshi kila leit pynsngewthuh paidbah ruh ha Iawpynsiñ Wahiajer halor kane hi ka jingpang da ka jinglehkai drama bad hikai ne pyni ruh ki kynja kilan met ba lah ban sumar ne iada na kane ka jingpang