Ha ka jingrakhe dap 42 ka Ri Bhoi College, la kynmaw burom ia u Dr. D.D. Lapang

Ka Ri Bhoi College, Nongpoh, mynta ka sngi kala rakhe ia ka jingdap 42 snem naduh ba la seng ia kane ka jaka ai jingnang jingstad, kaba la noh synniang shibun ha ka liang ka pule puthi bad ka jingkyntiew ia ka jingnang jingstad jong ki samla pule ka Ri Bhoi.

Ha kajuh ka sngi, ka College kala pynlong ruh ia ka jingkynmaw burom kaba kyrpang ia u Dr. D.D. Lapang, uba dei uwei na ki nongseng bad uba la long ruh u President barim jong ka Governing Body ka Ri Bhoi College. Kane ka jingkynmaw ka long ruh ban sah kynmaw ia ka jingdap shi snem naduh ka jingkhlad noh jong u ha ka 12 tarik u Nailur 2025.

Shwa ban sdang ka jingrakhe, la pynlong ia ka jingpynher lama jong ka Ri Bhoi College da u Bah Mayral Born Syiem, MLA ka Nongpoh, ha ryngkat ka jingdonlang ki nongpyniaid bad ki dkhot jong ka College.

Ia ka prokram rakhe la pynlong ha Conference Hall jong ka Ri Bhoi College, ha kaba la wan shim bynta lang da u Bah R.R. Makdoh, uba dei uwei na ki riew rangbah ba donbyntalang ha kaban seng ia ka Ri Bhoi College, u Prof. S.N. Lamare, Head Department jong ka History, NEHU, ka Kong W.K. Blah, Secretary ka Governing Body, u Bah Baluk Blah, u khun jong u Dr. D.D. Lapang, ryngkat bad kiwei kiwei ki riew rangbah.

Ka jingrakhe ka la long kaba iphuh iphieng da ki jingshim bynta jong ki nonghikai, ki professor, ki khynnah skul bad ki samla pule ryngkat ka jingiashimbynta ha ka rwai ka siaw ka put ka tem, ki jingshad bad ka jingpyni ia ka sap ka phong jong ki samla.

Ha ka jingai jingkren, u Bah R.R. Makdoh, u Prof. S.N. Lamare bad ka Kong Meaidibahun Blah ki la pynpaw ia ki kam bad ka jingnoh synniang kaba khraw jong u Dr. D.D. Lapang ha kaban seng bad kyntiew ia ka Ri Bhoi College.

Ki la pynpaw ruh ba ka jingtrei jong u kam shong tang ha ka liang ka pule puthi, hynrei kala kynthup ruh ia ka jingshakri paidbah bad ka jingpyrshang ban kyntiew ia ka them Ri Bhoi bad ka jylla Meghalaya hi baroh kawei.

U Dr. D.D. Lapang ula shah ithuh kum uwei na ki nongialam kiba khraw ka Ri Bhoi, uba la shakri ia ki paidbah lyngba ka kam sain hima sima. Ha ka por ba u dang im, u la bat ia ki kyrdan kum u Myntri Rangbah ka jylla, u Myntri Sorkar bad u MLA ka Nongpoh, kaba u la ioh jing jop haduh phra sien kynthih.

Nalor kine, kawei na ki jingnoh synniang kiba khraw jong u ka long ka jingpynioh ia ka Ri Bhoi District kaba pura ha u snem 1992. U la don bynta ruh ha ka jingseng ia ka Northern Ri Bhoi College bad ka Alpha English Higher Secondary School, ryngkat bad bun kiwei kiwei ki kam kiba thmu ban kyntiew ia ka pule puthi, ka roi ka par bad ïaka Them Ri Bhoi.

Ka jingrakhe 42 snem jong ka Ri Bhoi College bad ka jingkynmaw burom ia u Dr. D.D. Lapang ka long kum ka dak jong ka jingsah kynmaw ia ki jingnoh synniang jong u Maheh Dr. DD Langpang lem bad ki nongialam ka College kiba la don bynta ban tei ia ka pule puthi bad ïaka imlang sahlang ha Ri Bhoi.