Shi bynta jong ka jingrakhe la pynlong ïa ka Dr DD Lapang Memorial Lecture

Ka Dr DD Lapang Foundation bad ka University of Science and Technology Meghalaya (USTM) hynnin ka sngi, kala pynlong ia ka Dr DD Lapang Memorial Lecture kaba Nyngkong bad sam ia ki khusnam sha ki nongjop ha ka jingiakob thoh Essay, kum ka dak jong ka jingrakhe ia ka lyngkhuh sngi iap kaba 1 snem jong u Dr DD Lapang uba long u Myntri Rangbah barim ka jylla, kaba la pynlong ha ka Central Auditorium jongka USTM.

Haba kren ha kane ka jingialang u MLA ka Nongpoh u Bah Mayralborn Syiem ula ong, ba ka nam jong u Dr DD Lapang kum u Kpa ka Ri-Bhoi District kan iai bteng ban im bad ula pynkynmaw ia ka histori bad ia ki kam kiba la leh da u Dr Lapang ha kaban thaw bad ban kyntiew ia ka roi ka par jong ka Ri-Bhoi District.

Ha kane ka jingialang la wan ban iashimbynta da ki bahaiing bahasem u Dr Lapang kiba kynthup ia Sumarlang Oracle Lyngskor, ki khunsiew kiba kynthup ia ka Kong Bamedari Phylla Blah, Meaidibahun Blah bad Deimebanda Blah bad u khunksiew kurim u Aiborlang Warjri, u Chancellor ka USTM u Mahbubul Hoque, Vice Chancellor Prof G D Sharma, Ri-Bhoi College Principal ka Dr Elizabeth Kharkongkor, ki nonghikai, ki nongmihkhmat paitbah, ki samla pule bad kiwei kiwei.

Ha ka jingiakob thoh Essay, ha ka kyrdan Junior, Da-i-bashwa Rympeit jongka Alpha English Higher Secondary School ila ioh ia ka kyrdan kaba nyngkong bad ioh pdiang ia ka T.30,000, u Sankidon Makdoh jongka St Dominic Savio’s Higher Secondary School, Mawkhar ula wan baar bad ioh ia ka T.20,000 bad ka Phibashisha Marbaniang kaba la wan balai kala ioh ia ka T.10,000.

Ia ka Consolation Prize la ioh da u Jibansius Marbañiang, Wanplilang Kharbuli bad Omin Binong.

Katba ha ka Open Category, Jannata Mahbuba Khanam jongka USTM kala wan Nyngkong bad ka ioh pdioang ia ka T.50,000, ka Anamika Nandy jongka Solar Print Press kala wan baar bad ioh ia ka T.30,000 bad u Iaikyrshan Ryntathiang jongka Balawan College ula wan balai bad ioh pdiang ia ka T.20,000.

Ia ka Consolation Prize la ioh da ka Marshimti Kharwar jongka Shillong Commerce College, u Kennedy Rynjah jongka Manipal University Jaipur, Anchal Singh jongka Banaras Hindu University bad Shireen Aman jongka NEHU.

La pynkut ia kane ka jingialang, da ka jingai ia ki kyntien ai khublei na ka Kong Meaidibahun Blah, Assistant Professor bad Coordinator, Corporate Communication Cell, NIFT Shillong.