Ngin rung BJP na bynta ka bha ka miat ki paidbah

U MLA ka UDP na Mawphlang Constituency u Bah Beyondstar Mathew Kurbah ula ong, “Lada ka BJP ka pynurlong ia ki mat jingdawa ki MLA ka UDP khlem ar tatien kin leit iasoh bad ka BJP bad ula bynrap kam pher lada u rem ilekshon MLA 2028 hynrei ka jaidbynriew kan im.

“Ka jingialeh ka jong ngi bad ngi tur shaphrang na ka bynta ka jaidbynriew, kam pher wat lada ngi rem ia ka ilekshon ruh hynrei ka jaidbynriew ka im bad kan iai kynmaw sah ia kaei kaba ngi leh. Ngin ia pyrshang bad ngin ialeh hi kumba ka BJP ka lah kular ha kaba la iohsngew hi ha ki rynsan social media bad ha ki lad pathai khubor ha ka ri India bad ha ka thain shatei lammihngi bad la iohsngew hi ba kin ai, te ngi kyrmen ba kan ai bad ba ki paitbah kin sngewthuh bad ma ki hi kiban bishar ha u snem 2028. Kam pher lada nga rem ha ka elekshon 2028 lada ka jaidbynriew ka im, kadei kata kein kaba ngi ieng rangbah ban rung sha ka BJP” ong u Bah Beyondstar haba iakren bad ‘U Peitngor’ hadien ba la wai ka jingialang paitbah kaba la long ha Mawngap hynne ka sngi kaba u Bah Beyondstar ula pynshai sha ki paitbah ia ka jingthmu ka jongu bad kiwei pat ki MLA ka UDP ban pyniasoh sha ka BJP.

U Bah Beyondstar ula iathuh ba ka jinglum ia ka jingialang paitbah ka long ban pan ia ka jingkyrshan na ki paitbah halor ka jingthmu ka jongu ryngkat bad kiwei pat ki MLA ka UDP ban leit pyniasoh sha ka BJP lada ka pynurlong ia ki mat jingdawa kiba kongsan kiba la angnud da paitbah ka jylla.

Ki 5 tylli ki mat jingdawa ki MLA ka UDP, kiba ki nongialam kiba hakhlieh duh ka BJP kila kular ban leh eiei noh ki kynthup ia ban pynrung noh ia ka ktien Khasi ha ka Eight Schedule jong ka riti synshar ka ri, ban pynjynsur ia ki kyndon aiñ ban plie lad noh ia ka jingtih dewiong ha ka jylla Meghalaya, ban pyntreikam noh ia ka Meghalaya Residents Safety and Security Act (MRSSA), ban pynkynriah noh ia briew kiba shong basah ha Them Metor bad ban ai ia ka kyrdan Minority ne Social Status ia ka Seng Khasi bad Seiñ Raij.

Ka UDP kala dawa ruh ban pynkylla ia ki mat kiba ia dei bad ka Foreign Contribution (Regulation) Act (FCRA) ha kaba ka sorkar Pdeng ka la shimkhia bad kala phah ia kane sha ka Joint Parliamentary Committee ba kan khmih bniah biang.

Ka la dawa ruh ban pyntreikam noh ia ka ILP ha ka jylla, ki mat kiba iadei bad ka Sixth Scheduled, ka kam khaii pateng ha ki thain khappud bad kiwei kiwei.

“Lada ka BJP ka kular bad ka ai ia ki mat jingdawa, khlem artatien ki MLA ka UDP kin leit ban pyniasoh noh bad ka BJP. Lada ki MLA ka UDP ki leit pyniasoh sha ka BJP kam dei na ka bynta ka daw shimet ka jongki, hynrei kadei na ka bynta ka bha ka miat, ka roi ka par jong ki paitbah” ong u Bah Beyondstar.

U MLA ka Mawphlang ula iathuh, ba ha ka jingialang kaba la wan ban iashimbynta da ki nongkyrshan bad ki paitbah kila dap da ka jingsngewhun bad jingkmen bad kila ai ruh ia ka jingkyrshan ia u bad ia ki MLA ka UDP ba kidei ban iaid shakhmat bad ka jingthmu ka jongki.

“Ki paitbah baroh ki la ieng bad kila thap kti ia kane ka jingthmu ka jong nga, kadei hi na ka bynta ka jongki bad kam dei na ka bynta ka jong nga shimet” ong u Bah Beyondstar bad ka ong, “Ka daw kaba la pynbor ia u ban leit pyniasoh noh bad ka BJP kadei namar ka roi ka par jong ka Constituency, namar kala duna palat ka kam pynroi bad naduh u snem 2023 bad mynta lah palat 3 snem kam don jingkyrmen ban ioh ia kata ka roi ka par. Ngi kyrmen bad khmih lynti ba lyngba ka jingrung sha ka BJP kan ai ia ka roi ka par na ka bynta ka Mawphlang Constituency”.

Halor ki jingkynnoh ba ka BJP kadei kaba leh bein ia ki Khristan, u Bah Beyondstar ula ong, “Kane baroh kadei ka kam pynthame ia u paitbah da mano re mano, hynrei hapoh Mawphlang Constituency ki don ki jait niam ki bapher bapher, ki Seng Khasi ruh ki don bad ki Niam Khristan ki bapher bapher ruh ki don. Ngam ju iohsngew ba u Seng Khasi un kren bein ne yn ym shah ia ki Balang Khristan ba kin leit ïingmane bad kam ju don kum kane ka jingjia, lane ba ki Khristan kin kren bein ne niew bein ia u Seng Khasi ne ia kiwei kiwei ki jait niam ruh. Kam don jingwit eiei ban leit rung sha ka BJP kan ym ktah eiei ia ka niam, hynrei da ka jingdon ka jong ngi hapoh ka BJP ngi don ia ka bor bad ioh lad ban kren lada ka seng BJP kan pyrshang ban leh bein ia ki Khristan”.

“Lada ngi don habar ngim lah ban leh eiei, ngin lah tang ban rah lama iong bad ban pynlong ia ki dharna ba shah leh bein, da la kut kato ka lah kut noh yn ym don ba kren shuh. Hynrei lada ngi don hapoh ngin pyrshang ban iada kein ia ka jaidbynriew lajong ban lait na kine ki jingshah lehbein, kata keiñ ka jingthmu ka jong ngi” ong u MLA ka UDP.