Ka jingrakhe lyngkhuh 139 snem ka Balang Unitarian ka long ban pynthymmai ia ka jingngeit

Ki paid riewngeit ka Balang Unitarian ha Ri lum Khasi-Jaiñtia bad Karbi mynta ka sngi ki la kynmaw burom ia ka sngi sdang jong ka Balang ba la seng da u Babu Hajom Kissor Singh Nongbri naduh u snem 1887 bad mynta u snem kane ka Balang Unitarian ka la kynjoh sha u mawmer lyngkhuh dap snem 139 ka jingiaid lynti jong ka .

Bad kumba ka Balang Unitarian ha Jowai dei ka sengkmie la sakhi ba ka jinglehkmen kynmaw burom ia ka kane lyngkhuh dap snem ruh ka long kaba shongkun da ka jingshim bynta shitrhem ki paid riewngeit naduh ka jingiaseng step, jingiaseng sngi bad ha ka jingiaiaid Procession por janmiet ha ryngkat ka jingrah lang ruh ki dongmusa bad shim bynta ban rwai lynter lynti.

Haba iakren bad u Rupaia Lamar uwei na ki riew ryngbah ka balang Unitarian Jowai u ong, ia kane ka niam la seng da kaba pyniadei ruh bad ka jinglong kolshor u Khasi ka dei ruh kaba pdiang ia kino kino ki kolshor khamtam ha ka imlang sahlang.

Kaba ka kwah ban pynbha ia kiwei dei ka jingshim kylliang naka kolshor ki kristan kaba don ka jingsngewthuh iaka jingngeit haka jingpynshongnia khamtam haka jingnang jingstad bad jingthoh, kumta kila pdiang iaka Bible tangba ban pyndonkam daka jingpynshongnia ym ban pdiang lut baroh.

Haba iadei bad kane ka sngi Aniversary u ong ka jingmut ka long ban pynthymmai ia ka jingngeit ne ka por jong ka jingwan phai sha ka tynrai jingngeit na ka bynta ban pynthymmai ia ka jingngeit jingsngewthuh kum ki paid bangeit.

“Bad kumba latip ruh ia kane ka niam, ka niam ieid ia u briew ieid ia u Blei, kaba mut ym myntoi ban ong ba ngi ieid Blei khlem da ieid iaki para briew ba ngi lah ban iohi”. Ong u R.Lamar

Nangta halor ka phang jong mynta u snem kaba ong “Sha jingkhot Lashai ngan shah shkor” u ong kane ka phang ka khot bad kyntu iaki parabangeit ban pyntikna naka bynta ban pynskhem iaka jingngeit jingsngewthuh.

Ha kajuh ka por ruh ha kum kane ka sngi ki juh don ruh ka jingshim smai ban sumar iaka mariang ban iarap para briew, ban long kiba kylluid mynsiem.