Shah kem 2 ngut ba tynrah ia u Addl SP Traffic

Ki pulit ki la kem ia ki ar ngut ki dkhot ka KSU kiba la suba donkti ha ban tynrah da ka thuk thuk ia u Additional SP Traffic u Lovish Garg ha ka por ba u dang pynlong ia ka jingkhmih bniah bad jingtalasi ia ki kali ha Urkaliar.

Ia kine ki ar ngut ba shah kem la ialam sha ka iing kashari bad la hukum ban set ia ki 14 sngi hapoh ka Judicial Custody.

U SP in-charge Traffic ka East Khasi Hills, u Hari Prasath M R ula iathuh ba ka la don kawei ka thuk thuk ka ba la niah da uwei bad uwei uba shong nadien kiba pyrshang ban kiar na ka jingshah khmih bniah ha ka por kumba 1:30 mynstep, hynrei haba u Additional SP (Traffic) ula pyrshang ban pynsangeh ia ki, ki la tynrah pynban ia u bad ula mynsaw.

Ula ong ba kitei baroh arngut kila shah kem bad la kurup noh ia ka thuk thuk bad la pynngat ha ki kyndon ba ki don jingthmu ban shim ia ka jingim, ban ialeh pyrshah ia ki jingbthah jong ki nongtrei sorkar bad ban pynmynsaw jur ia u nongtrei sorkar.

Ula iathuh ba u Additional SP (Traffic) ula mynsaw ha ka bynta jong ka khlieh bad ki kjat bad la pynkit noh ia u sha Hospital bad lah dep ruh ban suh ia ki jaka kiba u mynsaw bad mynta u don ha ka met kaba biang.

U SP ula ong ba ha ka jingleh Medical Examination ne jingkhmih khmiah ia ka jinglong jingman jong kine ki arngut la lap ba kila shoh khawiang.

Ha kaba iadei bad ka jingkynnoh ba kine ki arngut ki dei ki dkhot ka KSU, u Prasath ula ong, ba kidei ki dkhot ka KSU bad ki pulit kim shim la leh ia kano kano da kaba shu mutdur bad ula ong ba ka jingtohkit ka dang iaid shakhmat bad kaei kaba ki pulit kila lap kadei kaba la dep ban pyntip lyngba ka kyrwoh khubor”.

Ula ong, ba ki don ki sabut kaba kim lah ban sam sha kiwei pat ha kane ka khyllipmat namar ba ka jingtohkit ka dang iaid shakhmat.