Leit khang ki seng bhalang ïa ki Bank ha kylleng ka Jylla ba plie sngi U Blei

i kynhun sengbhalang kynthup ka Khasi Students Union (KSU), Federation of Khasi Jaintia & Garo People (FKJGP) bad ka Hynniewtrep Youth Council (HYC) hynne ka sngi u Blei ki la leit ban khang bad beh ia ki nongtrei jong ki Bank bapher bapher kiba don ha kane ka jylla.
Ka jingleit khang ki sengbhalang ia ki Bank, ka long ba ki pyrshah ia ka jingphah plie ka sorkar ia ki bank ha ka sngi u Blei kaba dei ka sngi kyrpang jong ki paidbah riewngeit khristan.
Lah ban kdew ba ka sorkar India lyngba ka Reserve Bank of India (RBI), ka la bthah ia baroh ki Bank ba ki dei ban plie mynta ka sngi u Blei ka 27 tarik Nailur, kaba dei ruh ka sngi u Blei namar ba naduh lashai ka sngi ka 28 tarik haduh 30 tarik mynta u Nailur, kin sangeh treikam ha baroh kawei ka ri. Ka jingphah plie ha kane ka sngi u Blei ka long ba ki bank baroh ki dei ban pyndep ia ki jingdonkam khamtam ban shna bad pyllait ia ka tulop ki nongtrei sorkar.
Ha kane ka sngi, ki sengbhalang ki
la phah ia ki nongtrei jong ki bank bapher bapher ba kin leit phai noh sha la ki iing ki sem, ym ban wan trei.
La iohi ba ki seng-bhalang ha kane ka sngi ki la leit ban ap lypa ha khmat ki Bank bad ki la leit sha kylleng ki jaka ba don ki bank ba kim dei ban plie ha kane ka sngi kynthup ha Shillong, ha ki bynta ka East Khasi Hills, Jaintia Hills, ha West Khasi, Ri-Bhoi, South West Khasi, Eastern West Khasi Hills bad sha Garo Hills ruh kumjuh.