Ka jingkieng blei ba jrong kumba 30 phut ha Mawrah-Rangtmah

Ka Ri Khasi ka don shibun ka spah mariang kaba la ai kyrpang u Blei, ym tang ki lum ki wah, ki kshaid, ki krem ki kroh hynrei bun kiwei pat.
Ka thain Mawrah-Rangtmah ka dei kawei kaba don ka mariang ki sawdong sawkun kiba itynnad bad ki jingthaw ba itynnad. Kane ka shnong ka jngai tang kumba 40km eiei na Shillong, bad ka hap ha 12 Shnong-Laitkroh Block, East Khasi Hills.
Ha kane ka shnong Mawrah-Rangtmah, ki don shibun ki Khanapuriskam ha kaba kiba ki briew ki dang ioh sngew bad tip na ki riew hyndai mynshwa bad kawei ka dei ka jingkieng blei, kaba don ha ka wah lyngkor hati. Kane ka jingkieng Blei, dei kaba la shna kyrpang u maw ba heh lyngkneb ba madan bad jrong sak kumba 30 phut na shiliang sha shiliang bad uba iar kumba 10 phut eiei bad hakhrum pat la tuid ka um. Ka jingjrong na madan ha u maw, ka long kumba 3 phut eiei bad lah ban iaid da dem ki briew hapoh.
Ban poi sha une u maw jingkieng blei, la ialam ia ngi da u trai shnong bah Lurshai Dohling uba la iathuh ba ka um ha ka por lyiur kam ju tap ia une u maw hynrei ka tuid beit napoh.
Kane ka them kaba tap da ki rong ba jyrngam ka mariang, la don ruh kawei ka jaka kaba ki khot ki briew kum ka eit blei. Ym lah ban tip tynrai, kaei ka daw kaba la pyllong ia ki riew hyndai ban jer ia kane ka jaka kum ka eit blei hynrei la mutdur ba ka lah ban don kaei re kaei mynshwa, kaba la pyllong ia ki ban khot kumta.
Ha jingiaid lynti ban peitkai itynnad ia ka mariang ha katei ka jaka, ngi la iohi ia u syntiew kaba khot kum u tiew syngkhlieh ha ka shnong Mawrah-Rangtmah.
Na ka jingbatai u bah Lurshai, une u syntiew u dei uba phuh itynnad bha ha kane ka aiom synrai bad shisien ba la phuh une u syntiew, ki briew ki ju ioh baiong khlieh na ka jingkylla mariang bad ym ju kham bha ban thied sniang ha ki por ba phuh une u syntiew bad ka diengsong namar ki lah ban ioh jingpang mynshwa. Hynrei mynta da ka jingkylla ka juk, kam da long shuh kumta, ha kaba ki briew kila lah ban sumar, ban tih dawai, ym kum ha ki por hyndai.
Kane ka jingleit iaid ia katei ka them, ka la ai shibun ia ki jingtip shaphang ka spah mariang ka shnong Mawrah Rangtmah bad kaba shong jingmut bha ka long ba kane ka shnong, kan khring khlem jingartatien ia kiba wankai lada lah ban pynitynnad bad pynbha ia ki lynti namar ba ka don ruh ki ksaid ban iaid kjat, ka riat kaba thliew jylliew bha ha kaba ka don ka lyhuh wah bad ki pung kiba khuid bad itynnad.